ДХХ Наманган вилоят бошқармаси ҳамда вилоят божхона бошқармаси ходимлари томонидан ўтказилган тезкор тадбирда ўзи билан кўп миқдорда психотроп моддалар олиб кетаётган шахс қўлга олинди. Бу ҳақда «Дарё» мухбири Азизбек Абдувалиев хабар бермоқда.
Ходимлар томонида Поп туманидаги «Наманган» мунтазам йўл-патруль хизмати масканида Наманган—Тошкент йўналишида ҳаракатланаётган Nexia русумли автомашина тўхтатилган.
Автомашина холислар иштирокида кўздан кечирилганда, унда йўловчи сифатида кетаётган Тошкент шаҳрида яшовчи, 1989 йилда туғилган фуқаронинг ёнида 2237 дона «Регапен», 400 дона «Селофен» ва 300 дона «Тропикамид» кучли таъсир қилувчи дори воситалари борлиги аниқланиб, процессуал тартибда расмийлаштирилиб олинди.
Аниқланишича, қирғистонлик фуқаро томонидан давлат чегарасидан айланма йўллар орқали вилоятнинг Учқўрғон тумани ҳудудига ўтказиб берилган ушбу дори воситалари Тошкент шаҳрида сотилиши режалаштирилган.
Ҳозирда ушбу ҳолат юзасидан жиноят иши қўзғотилиб, тергов ҳаракатлари олиб борилмоқда.
Мавзуга доир:
Изоҳ (0)