7 июнь, сешанба куни Саудия Арабистони подшоҳлиги томонидан Ўзбекистон Республикасига совға сифатида тақдим этилган хурмони топшириш маросими бўлиб ўтди.
Маросимда Икки муқаддас масжид ходимининг Ўзбекистон Республикасидаги элчиси Юсуф бин Солиҳ ал-Гаҳра ал-Утайбий подшоҳ Салмон номидаги ёрдам ва инсонпарварлик ишлари маркази делегацияси аъзолари билан қатнашди.
Шунингдек, маросимда Ўзбекистон мусулмонлари идораси раисининг биринчи ўринбосари Ҳомиджон Ишматбеков, Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари Давронбек Махсудов, Ислом цивилизация маркази директорининг ўринбосари Фирдавс Ҳалимов, «Вақф» хайрия жамоат фонди бошқарув кенгаши раиси вазифасини бажарувчи Музаффар Саломов иштирок этдилар.
Тадбир мобайнида Ҳомиджон Ишматбеков Саудия Арабистони подшоҳлиги ҳукумати ва Подшоҳ Салмон номидаги ёрдам ва инсонпарварлик ишлари марказига совға учун миннатдорчилик билдириб, унинг биринчи маротаба тақдим этилмаётгани ва бундай хайрия ишлари ўзбек-саудия алоқалари рамзи эканини таъкидлади.
Ўз томонидан элчи Ўзбекистон Республикаси президенти Шавкат Мирзиёевнинг турли соҳаларда саудия-ўзбек алоқалари ривожланишида тутган муҳим ўрнини кўрсатиб ўтди.
Хусусан, сўнгги икки йилда икки мамлакат ўртасидаги муносабатлар сезиларли даражада ривожланганини билдирди.
Изоҳ (0)