Сурхондарё вилояти ҳокими Тўра Боболов «Дарё» билан суҳбатда ҳокимларнинг фарзандига қимматбаҳо совғалар бериши ҳақида гапириб, «ҳокимларнинг фарзанди ҳам, бошқаларнинг фарзанди каби фарзанд, уларнинг ҳам орзу-ҳаваси бор», деди.
«Дарё» мухбири Тўра Боболов билан суҳбатда интернетда вилоят ҳокимларининг фарзандларига қимматбаҳо машина совға қилгани акс этган видеолар тарқалганини эслатиб, Тўра Боболов ўғлига қимматбаҳо машина совға қилгани айтилган видеога эътибор берган ёки бермаганини сўради.
«Ҳокимларнинг фарзанди ҳам бошқаларнинг фарзанди каби фарзанд. Улар ҳам яхши ният қилади. Орзу-ҳавас қилади. Шунингдек, ҳар бир ота-она ёшларнинг, фарзандининг орзу-ҳавасига эътиборли бўлиши керак. Ва яхши кунлари тарихга муҳрланиб қолишини истайди. Аммо меъёрдан оширмаслик керак. Айнан мен ота сифатида шунга эътибор бераман», — деди вилоят ҳокими.
2020 йил хонанда Муниса Ризаева Андижон вилояти ҳокими Шуҳрат Абдураҳмоновнинг кичик қизи 19 ёшга тўлиши муносабати билан 16 август куни ташкил этилган оилавий маросимда хизматда бўлгани, маросимдан фото ва видеолар 17 август куни ижтимоий тармоқларда тарқалгани хабар берилганди.
Эълон қилинган видеоёзувларда ҳоким қизи билан биргаликда катта байрам тортини кесаётгани айтилганди. Шунингдек, ҳоким қизига Gentra автомобилини совға қилгани хабар берилганди.
Андижон вилояти ҳокимлиги ахборот хизмати тўйнинг биринчи қисми ҳақиқатдан ҳам ҳоким қизининг тўйидан олинганини, аммо видеонинг иккинчи қисми бу тўйга тааллуқли эмаслигини билдириб, «Ҳурматли ижтимоий тармоқ фойдаланувчилари, юқоридагиларни инобатга олиб, ёлғон ахборот тарқатиш, шу жумладан, оммавий ахборот воситаларида, телекоммуникация тармоқларида ёки интернет тармоғида тарқатиш ҳолатлари учун қонуний жазо чоралари мавжуд эканини эслатиб ўтамиз», — деганди.
Изоҳ (0)