Наманганда 2021 йили 3200 нафар эҳтиёжманд талабанинг контракт пулларини тўлаб беришга 10 миллиард сўм йўналтирилди. Бу ҳақда вилоят ҳокими Шавкат Абдураззоқов олий таълим муассасалари талаба-ёшлари билан учрашуви давомида маълум қилди, дея хабар беради «Дарё» мухбири Азизбек Абдувалиев.
Учрашувда қайд этилишича, 2022 йили ҳозирга қадар шу мақсадда ўтказиб берилган маблағ миқдори 3 миллиард сўмдан ошди.
«Намангандаги олий таълим муассасаларида 43 минг нафардан ортиқ талаба таҳсил олмоқда. Яқингача уларнинг сони 15 мингдан ошмасди. Энди бу рақамлар янада кўпаяди. Чунки Наманган шаҳрида Турон университети, Тўрақўрғонда Ибрат мактаби негизида чет тиллар институти очиляпти. Янги Наманган шаҳарчасида мактаб, техникум ва олий ўқув юртидан иборат таълим кластери ташкил этишни режалаштирганмиз», — деди Шавкат Абдураззоқов.
Шундан сўнг ҳокимнинг талабалар билан мулоқоти бошланди.
Мазкур мулоқот давомида ёшларнинг энергия тежовчи қурилмалар ўрнатиш, табиий маҳсулотлардан тайёрланган маҳаллий тиш пастаси ишлаб чиқариш, ҳоким стипендиясини жорий этиш, инглиз тили талаффузидаги хатоларни ўнглаш лойиҳаси, онлайн савдо платформасини йўлга қўйиш, мактабларга рельефли харита ва ақлли глобуслар етказиш, ҳокимлик ва бошқармаларда очиқ эшиклар кунларини ўтказиш каби таклифлари билдирилди.
Талабалардан бирининг вилоятдаги олий таълим муассасаларида болалар боғчалари очиш ҳақидаги мурожаати вилоят раҳбари томонидан маъқулланди. Ҳозирда бундай мактабгача таълим ташкилоти фақат Наманган давлат университетида мавжуд.
«Юқори курсларда таҳсил олаётган талаба ва магистр қизларимиз орасида турмушга чиққанлари, фарзандли бўлганлари кўп. Қолаверса, профессор-ўқитувчиларимиз сафида ҳам аёллар аксариятни ташкил этяпти. Шу маънода ҳар бир олий ўқув юртида бундай боғчалар бўлгани яхши», — деди Шавкат Абдураззоқов.
Бизнес-лойиҳалар ва бизнес-тренинглар ҳақида сўз кетар экан, вилоят ҳокими Наманганда машҳур тадбиркорлар кўп эканлигига эътибор қаратди.
«Наманганда мана-ман деган тадбиркорлар бор. Улардан бири Чустдаги корхонада 3 минг нафар одам ишлатяпти. Бизнес-тренерлар асли бизнес юритиш ва жамоани ишлатишни улардан ўрганиши керак. Талаба-ёшларни шундай инсонлар билан мотивацион мулоқотларини тез-тез ўтказиб туриш керак», — деди Наманган ҳокими.
Учрашув якунида вилоят инновацион ривожланиш бошқармаси масъуллигида талабалар ташаббусларини қўллаб-қувватлаш кенгаши тузиш, ушбу кенгашда ёшларнинг стартап лойиҳаларини кўриб чиқиб, молиялаштириш учун таклифлар тайёрлаш юзасидан топшириқ берилди.
Изоҳ (0)