Андижон вилояти халқ таълими бошқармаси бошлиғи Азизбек Миркомилов ҳибсга олингани ҳақида хабар берилган эди. Халқ таълими вазирлиги ҳолат юзасидан маълумот берди.
Қайд этилишича, ХТВнинг Ички аудит хизмати томонидан доимий равишда бюджет маблағларини мақсадли сарфланиши юзасидан тизимли равишда ўрганиш ишлари олиб бориб, аниқланаётган камчиликлар юзасидан ОАВ орқали ҳисобот бериб борилади.
Андижон вилояти халқ таълими бошқармаси тизимида ўтказилган ўрганишлар натижасида аниқланган бюджет маблағларининг ноқонуний сарфланиши юзасидан тегишли ҳужжатлар расмийлаштирилиб, тўпланган материаллар қонуний баҳо бериш учун Ҳисоб палатаси ҳамда ХТВнинг Ички аудит хизмати томонидан Бош прокуратурага 2021 йилнинг ноябрь ойида тақдим этилган ва ушбу ҳолат бўйича Жиноят кодексининг тегишли моддалари билан жиноий иш қўзғатилган.
«Айни дамда жиноят иши доирасида айбдорларни аниқлаш мақсадида бир нечта ташкилот ва идоралар, шу жумладан вилоят халқ таълими бошқармаси мансабдор шахслари ҳам терговга жалб этилганлигини маълум қиламиз», — дейилади вазирлик хабарида.
Андижон вилоят халқ таълими бошқармаси бошлиғи Азизбек Миркомилов Андижон шаҳри ҳокими Баҳром Ҳайдаровнинг қамоққа олинишига сабаб бўлган жиноий иш — бюджетнинг 48 миллиард сўмини талон-торож қилишда гумондор сифатида 7 июнь куни ҳибсга олинганди.
Бош прокуратура томонидан олиб борилаётган тергов иши доирасида 37 нафар шахсга нисбатан айблов эълон қилган. Айни кунга қадар етказилган зарарнинг 23 фоизи қопланган.
Изоҳ (0)