Namanganda 2021-yili 3200 nafar ehtiyojmand talabaning kontrakt pullarini to‘lab berishga 10 milliard so‘m yo‘naltirildi. Bu haqda viloyat hokimi Shavkat Abdurazzoqov oliy ta’lim muassasalari talaba-yoshlari bilan uchrashuvi davomida ma’lum qildi, deya xabar beradi “Daryo” muxbiri Azizbek Abduvaliyev.
Uchrashuvda qayd etilishicha, 2022-yili hozirga qadar shu maqsadda o‘tkazib berilgan mablag‘ miqdori 3 milliard so‘mdan oshdi.
“Namangandagi oliy ta’lim muassasalarida 43 ming nafardan ortiq talaba tahsil olmoqda. Yaqingacha ularning soni 15 mingdan oshmasdi. Endi bu raqamlar yanada ko‘payadi. Chunki Namangan shahrida Turon universiteti, To‘raqo‘rg‘onda Ibrat maktabi negizida chet tillar instituti ochilyapti. Yangi Namangan shaharchasida maktab, texnikum va oliy o‘quv yurtidan iborat ta’lim klasteri tashkil etishni rejalashtirganmiz”, — dedi Shavkat Abdurazzoqov.
Shundan so‘ng hokimning talabalar bilan muloqoti boshlandi.
Mazkur muloqot davomida yoshlarning energiya tejovchi qurilmalar o‘rnatish, tabiiy mahsulotlardan tayyorlangan mahalliy tish pastasi ishlab chiqarish, hokim stipendiyasini joriy etish, ingliz tili talaffuzidagi xatolarni o‘nglash loyihasi, onlayn savdo platformasini yo‘lga qo‘yish, maktablarga relyefli xarita va aqlli globuslar yetkazish, hokimlik va boshqarmalarda ochiq eshiklar kunlarini o‘tkazish kabi takliflari bildirildi.
Talabalardan birining viloyatdagi oliy ta’lim muassasalarida bolalar bog‘chalari ochish haqidagi murojaati viloyat rahbari tomonidan ma’qullandi. Hozirda bunday maktabgacha ta’lim tashkiloti faqat Namangan davlat universitetida mavjud.
“Yuqori kurslarda tahsil olayotgan talaba va magistr qizlarimiz orasida turmushga chiqqanlari, farzandli bo‘lganlari ko‘p. Qolaversa, professor-o‘qituvchilarimiz safida ham ayollar aksariyatni tashkil etyapti. Shu ma’noda har bir oliy o‘quv yurtida bunday bog‘chalar bo‘lgani yaxshi”, — dedi Shavkat Abdurazzoqov.
Biznes-loyihalar va biznes-treninglar haqida so‘z ketar ekan, viloyat hokimi Namanganda mashhur tadbirkorlar ko‘p ekanligiga e’tibor qaratdi.
“Namanganda mana-man degan tadbirkorlar bor. Ulardan biri Chustdagi korxonada 3 ming nafar odam ishlatyapti. Biznes-trenerlar asli biznes yuritish va jamoani ishlatishni ulardan o‘rganishi kerak. Talaba-yoshlarni shunday insonlar bilan motivatsion muloqotlarini tez-tez o‘tkazib turish kerak”, — dedi Namangan hokimi.
Uchrashuv yakunida viloyat innovatsion rivojlanish boshqarmasi mas’ulligida talabalar tashabbuslarini qo‘llab-quvvatlash kengashi tuzish, ushbu kengashda yoshlarning startap loyihalarini ko‘rib chiqib, moliyalashtirish uchun takliflar tayyorlash yuzasidan topshiriq berildi.
Izoh (0)