Алишер Усмонов ва Ирина Винер: илк учрашув, 6 йиллик ҳижрон ва 30 йиллик никоҳдан кейинги ажрашиш тарихи

Кўпчилик уларнинг муҳаббатига ҳавас қилган, чунки Ирина Александровна ва Алишер Бурҳонович оғир синовларни бошдан кечирса-да, доим бирга бўлган. Гимнастика мураббийи Иринанинг шогирдлари ва эр-хотин билан таниш бўлган ҳар бир киши уларнинг турмушини ҳар доим кучли ва мустаҳкам деб билган.

Аммо қанчалик ғалати эшитилмасин севги ҳам тугар экан. Май ойининг ўрталарида Винер ва Усмонов ажрашишаётганини эълон қилишди. Ҳозирда улар ажралиш жараёнида бўлса-да, «Lisa.ru» нашри бу икки кучли инсоннинг севги ҳикояси қандай бошланганини ёдга олади.

Илк учрашув

Ирина Александровна ва Алишер Бурҳонович илк бор Тошкентдаги спорт мажмуасида учрашган. Ўшанда Винер умидли ва истеъдодли гимнастикачи эди, Усмонов эса қиличбозлик билан шуғулланарди. Йигит бир кўришдаёқ мовий кўз, қора соч чиройли қизни севиб қолади, лекин анча вақтгача ўз ҳис-туйғулари ҳақида гапиришга журъат эта олмайди.

Спортчи қиз унга жуда мағрур ва жиддий бўлиб кўринади, балки Усмонов рад этилишидан қўрққандир. Аммо бир лаҳзалик бу учрашув кўп йиллар давомида унинг хотирасида қолади. Кейинчалик Алишер Бурҳонович ўшанда биринчи марта ва бутун умрга севиб қолганини тан олган.

Маълум вақтга қадар уларнинг йўллари ажралади: Усмонов Москвага кетади ва МГИМОга ўқишга киради. Винер эса Ўзбекистонда карьерасини қуришда давом этади, бир неча бор чемпион бўлади. Кейинчалик у турмушга чиқади ва Антон исмли ўғил фарзанд кўради. Одатда у биринчи турмуш ўртоғи ҳақида гапиришни хоҳламайди.

Бир куни Ирина Александровна Москвага хизмат сафарига боради ва у ерда тасодифан Алишер Бурҳонович билан учрашиб қолади. Усмонов қизни дарров танийди, лекин Ирина ватандошини пайқамай, унинг ёнидан ўтиб кетади.

Кейинчалик, иккаласининг эслашича, ўша куни гимнастикачининг кайфияти бўлмаган, шунинг учун эркак уни чақирганда, у бироз ҳайрон қолган. Аммо Усмонов синглиси у билан бирга машғулот ўтказганини айтиши биланоқ Винер дарҳол танийди.

Кейинчалик у Усмоновни яхши кўриб қолади. Баъзиларнинг айтишича, спортчи биринчи турмуш ўртоғидан айнан Усмонов туфайли ажрашган. Аввалига улар ўрталаридаги муносабатни ҳаммадан яширишади. Алишер Бурҳонович севгилисини ота-онаси билан таништиришга анча вақтгача журъат эта олмайди, чунки отаси унга оқила уй бекаси бўладиган оғир-босиқ қиз қидирарди. Биринчи турмушидан ажралган ва фарзанди бўлган спортчи идеал келин орзусига тўғри келмасди. Бундан ташқари, Ирина Александровна Усмоновдан беш ёш катта эди. Бироқ Усмонов ота-онасини фақат шу аёл билангина чинакам бахтли бўлишига ишонтиришни уддасидан чиқади.

Оилавий бахт ва синовлар

Севишганлар турмуш қуришга улгурмасдан, уларнинг тинчини Усмонов иштирок этишига тўғри келган суд бузади. У порахўрлик ва фирибгарликда айбланади ва саккиз йилга қамоқ жазосига ҳукм қилинади. Тадбиркорнинг ўзи айбдор эмаслигини қайта-қайта таъкидлайди: ўша вақтда кимлардир бадавлат одамларнинг фарзандларини озодликдан маҳрум қилиб, уларга зарар етказмоқчи бўлишади.

Миллиардернинг отаси эса шаҳарда машҳур прокурор бўлган. Олти йил қамоқда ўтириб чиққач, 2000 йилда Алишер Бурҳонович айбсиз деб топилади.

Ирина Александровна шу йиллар давомида севгилисини кутган, қачондир обрўси тикланишига ва айбсиз деб тан олишига ишонган. Ўша пайтда баъзи танишлари спортчига бизнесменни унутиши лозимлигини маслаҳат ҳам беришади, чунки қамалган одам билан турмуш қуриш Винернинг карьерасига салбий таъсир кўрсатиши мумкин эди.

Ўша пайтда унга мамлакатни тарк этиш ва халқаро мусобақаларда қатнашиш тақиқланган бўлса-да, Ирина ҳеч кимга қулоқ солмайди. Алишер Бурҳонович қамоқда ўтирган пайти ўз танловида адашмаганини англаб етиб, ўша ердан севгилисига шойи рўмол юборади, бу эса турмуш қуриш таклифини билдирарди.

Гимнастикачи совғани мамнуният билан қабул қилади ва турмуш қуришга рози бўлади. Уларнинг тўйи Усмонов озод қилинганидан сўнг — олти йилдан кейин бўлиб ўтади. Кейинчалик улар Москвага кўчиб келиб, янги ҳаёт бошлашади.

Бу ерда Алишер Бурҳонович тадбиркорлик ва бизнес билан шуғуллана бошлайди, Ирина Александровна эса иқтидорли гимнастикачиларга мураббийлик қилади, уларнинг дунё миқёсида тан олинишига ёрдам беради. Турмуш ўртоғи ҳар доим уни қўллаб-қувватлаган ва рафиқаси эришган ғалабалардан хурсанд бўлган. Винер ҳам кўп жиҳатдан у туфайли муваффақиятга эришганини доимо тан олади.

Москвага келганимдан кейин спортчи қизларим билан Новогорскдаги базада шуғулланганман, ижара ҳақини эса Алишер Бурҳонович тўлаган. Шунингдек, Яна Батиршина, Амина Зарипова билан эришилган ғалабалар унинг ёрдами туфайли. Аммо болаларга онаси каби яқин бўлмасангиз, натижага эришиб бўлмайди. Шу боис Алишер Бурҳонович, бир томондан, спорт билан шуғулланишимдан норози бўлса, иккинчи томондан, болаларнинг муваффақиятидан доимо хурсанд бўларди, — деди спортчи.

Усмонов баъзан қаттиққўл бўлса-да, аслида романтик ва меҳрибон эр эди. Хотини учун у ҳеч нарсани аямасди — уни гулларга кўмиб ташлашга, қимматбаҳо совғалар ҳадя қилишга тайёр эди. Бироқ тадбиркор ҳам рафиқасининг кўмагисиз бундай муваффақиятга эришолмасди. Ирина унга бизнес юритишда ёрдам бермади, лекин шарқ аёли сифатида доимо уни тинглашга, итоаткор бўлишга ва севишга ҳаракат қилди.

Мен ҳар доим Алишерга: «Сен — даҳосан! Сен — буюксан!» деб айтардим. Охир-оқибат шундай ҳам бўлди. У умидсизликка тушганда гарчи бу ҳақда ўйлаш ҳақиқатга тўғри келмаса-да, мен барибир ҳаммаси яхши бўлишини тинмай такрорлардим. Унинг супер эканлигини билардим, — деб тан олади спортчи.

Машҳур мураббий у учун ишдан кўра оила муҳимроқ эканлигини бир неча бор айтган — у буни ўз шогирдларига ҳам ўргатган. Алишер Бурҳонович ўғли Антонни ўз фарзандидек тарбиялаган, аммо уларнинг умумий фарзандлари йўқ.

Кимлардир айнан шу нарса уларнинг ҳис-туйғуларининг совишига олиб келган бўлиши мумкин деб ҳисоблайди, бошқалар эса бир-биридан узоқда бўлиш муносабатларга таъсир қилганига амин, чунки сўнгги йилларда эр-хотин деярли бирга яшамас эди. Май ойи бошида Алишер Усмонов ажрашиш учун ариза берди, 19 май куни бу қарор ҳаммага маълум бўлди. Миллиардер ва мураббийнинг вакиллик томонлари учрашишган, аммо ҳеч ким энг кучли жуфтликлардан бири бўлган эр-хотин ажралишининг ҳақиқий сабабларини маълум қилмаган.