Давлат хавфсизлик хизматининг Андижон вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда Андижон шаҳрида ўтказилган тезкор тадбир натижасида Қирғизистондан ноқонуний олиб келинган кучли таъсир қилувчи дори воситаларини сотиш билан шуғулланган жиноий гуруҳ фаолиятига чек қўйилди. Бу ҳақда ДХХ матбуот хизмати «Дарё»га маълум қилди.
Олинган маълумотларга кўра, муқаддам судланган ака-ука (1988 ва 1991 йилларда туғилган) томонидан 2 нафар қариндошларини жалб этган ҳолда, кишига вақтинчалик сархушлик бағишлайдиган кучли таъсир қилувчи дори воситаларининг барқарор савдоси йўлга қўйилган.
Дастлаб, вилоят марказидаги «Навоий» шоҳкўчасида ўтказилган тезкор тадбирда 25 ёшли муқаддам судланган шахс бошқарувидаги Nexia-3 русумли автомашина тўхтатилиб текширилганда, унинг салонида 70 дона «Тропикамид» кучли таъсир қилувчи дори воситалари борлиги аниқланиб, процессуал тартибда расмийлаштирилиб олинган.
Сўнгра унинг кўрсатмаси асосида жиноий гуруҳнинг бошқа бир аъзоси — муқаддам уч маротаба судланган 39 ёшли аёлнинг яшаш хонадонидан таркибида психотроп моддалар туркумига кирувчи «тригексифенидил гидрохлорид» моддаси бўлган 75 дона «Циклодол» дори воситаси, шунингдек, 1715 дона «Регапен», 211 дона «Тропикамид», 200 дона «Зардекс», 185 дона «Лирика» кучли таъсир қилувчи дори воситалари тегишли тартибда ҳужжатлаштирилиб олинган.
Бундан ташқари, жиноий гуруҳ етакчилари бўлган ака-уканинг маҳаллий аҳоли орасида электросет кўчаси дея аталувчи А.Ҳайдаров кўчасида жойлашган яшаш хонадонларида ва шаҳарнинг Амир Темур кўчасида жойлашган уларга тегишли «ХХХ» тунги клубида ва автомашиналар ювиш шохобчасида ҳам тинтув-тергов ҳаракатлари ўтказилган.
Натижада, келгусида сотиш мақсадида сақлаб келинаётган умумий қиймати 103 миллион сўмлик 3 минг дона «Тропикамид», «Регапен» «Лирика» номли кучли таъсир қилувчи дори воситалари, «бита» таёқлари, ўткир тиғли жисмлар, алоқа воситалари, катта миқдордаги пул маблағлари, ҳисоб-китоб дафтарлари, гаров сифатида қолдириб кетилган ҳайдовчилик гувоҳномаси, диплом, никоҳ тузилганлиги ҳақида гувоҳнома, фуқаролик паспортлари аниқланиб, процессуал тартибда расмийлаштириб олинган.
Шунингдек, ДХХ ходимлари томонидан кучли таъсир қилувчи дори воситалари савдосига қарши ўтказилган бошқа бир тезкор тадбирда эса Андижон шаҳрида яшовчи фуқаро (1986 йилда туғилган) бошқарувидаги Cobalt автомашинаси шаҳарнинг «Дўстлик» МФЙ ҳудудида тўхтатилиб текширилган. Текширув давомида машинадан 2296 дона «Лирика», 1598 дона «Тропикамид» ва 337 дона «Регапен» дори воситалари борлиги аниқланиб, ўрнатилган тартибда олиб қўйилган.
Бу каби тадбирлардан яна бири Олтинкўл туманида ўтказилиб, унда Наманган—Андижон йўналишида ҳаракатланиб келаётган Lacetti автомашинасида 4032 дона «Регапен» ҳамда 971 дона «Тропикамид» кучли таъсир қилувчи дори воситалари борлиги аниқланган. Маълум бўлишича, Олтинкўл туманида яшовчи 38 ёшли ҳамда Андижон шаҳрида истиқомат қилувчи 27 ёшли фуқаролар ушбу дори воситаларини Андижон шаҳрида сотишни режалаштирган.
Ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ Фарғонада томорқасида 100 туп кўкнори етиштираётган шахс аниқлангани, Тошкент шаҳри ва вилоятида кучли таъсир қилувчи дорилар савдоси билан шуғулланган 9 киши ушлангани тўғрисида хабар берилганди.
Изоҳ (0)