Ўзбекистонда белгиланган меъёрга жавоб бермайдиган 50 тоннадан кўпроқ йодланган ош тузи реализацияси тақиқланди. Бу ҳақда Санитария эпидемиологик осойишталик ва жамоат саломатлиги хизмати маълум қилди.
Маълум қилинишича, бугунги кунда республикада 117 та йодланган ош тузини ишлаб чиқариш ва қадоқлаш корхоналари мавжуд.
2022 йилда 47 та корхоналарда ўрганишлар ўтказилган. Май ойининг ўзида 7 та йодланган ош тузини ишлаб чиқариш ва қадоқлаш корхоналарида ўрганишлар ўтказилган ва намуналар лаборатория текшируви учун келтирилган.
Олиб келинган 11 та туз намунасидан 27,2 фоизи белгиланган меъёрга жавоб бермагани сабабли жами 50,6 тонна ош тузи реализацияси тақиқланган.
Ўрганишлар давомида аниқланган камчиликлар бўйича 7 нафар жавобгар шахсларга нисбатан баённомалар расмийлаштирилиб, қонунчиликда белгиланган тартибда кўриб чиқиш бўйича жойлардаги судларга ҳужжатлар тақдим этилган.
Аввалроқ Тошкентда 66 кг сифатсиз «Андижон музқаймоғи» йўқ қилингани тўғрисида хабар берилганди.
Изоҳ (0)