Мунтазам равишда аччиқ таомлар истеъмол қилиш организмга қандай таъсир ўтказади?

Табиийки, ҳамма таомлар ҳам иштаҳани очмаслиги мумкин. Бундай пайтларда соус ва зираворлар ёрдамга келади. Кўпчилик аччиқ таомни яхши кўради, айниқса хитой ва корейс ошхоналарини севувчилар. Аммо уларни ҳар куни истеъмол қилиш натижасида организмда қандай ўзариш юз беради? Grazia нашри ушбу саволга жавоб берди.

Метаболизмни тезлаштиради

Аччиқ таом истеъмол қиладиган ҳар бир киши унинг ножўя таъсирлар ҳақида билади: кучли терлаш, кўз ёшланиши, юрак уриши тезлашиши ва нафас қисилиши. Яхши томони шундаки, кўплаб зираворларнинг бир қисми бўлган ва овқатга жуда аччиқ таъм берадиган чили қалампирида капсаицин мавжуд. Ушбу модда метаболизмни тезлаштиради, бу эса вазн йўқотишни осонлаштиради.

Юрак хасталиклари хавфини камайтиради

Доктор Керри Ламнинг сўзларига кўра, аччиқ таом истеъмол қиладиган одамларда юрак-қон томир касалликлари — инсульт ва юрак хуружлари камроқ кузатилиши аниқланган. Гап шундаки, капсаицин организмдаги яллиғланиш жараёнларини секинлаштиришга ёрдам беради ва холестерин даражасини пасайтиради.

Кайфиятни кўтаради

Мутахассисларнинг таъкидлашича, зираворлар мияни кайфиятни кўтарувчи гормон — серотонинни чиқаришга ундайди. Бу стресс ва ташвишдан халос бўлишга ёрдам беради ва кун давомида инсон ўзини яхши ҳис қилади.

Овқат ҳазм қилиш тизими билан боғлиқ муаммолар бўлиши мумкин

Аччиқ овқат оғизда ачишиш ҳиссини келтириб чиқаради ва қизилўнгач ва ошқозон-ичак трактининг шиллиқ қаватини безовта қилади. Шу сабабли, ошқозон кислотаси ошқозон-ичак трактига қуйилиб, бу соҳада ноқулайлик ва оғриқни келтириб чиқариши мумкин.

Уйқу сифати ёмонлашади

Мутахассислар кечки овқат учун аччиқ таомлар истеъмол қилишни тавсия этмайди, акс ҳолда туни бўйи уйқусизлик қийнаши мумкин. Бунинг сабаби шундаки, аччиқ зираворлар тана ҳароратини кўтаради, улар ҳам юрак уришини тезлаштириши мумкин.