Лабларнинг ёрилган ва қуруқ териси ҳар доим ҳам эътиборсиз қолдирадиган нарса эмас ва организмдаги жиддий муаммолардан дарак бериши мумкин, деб ёзади Marie Claire.
Аслида организмда қандайдир муаммонинг мавжудлиги лабларнинг қуриши, ёрилиши ва терисининг кўчишига олиб келади. Бу соҳадаги тери жуда нозик ва сезгир бўлиб, ёғ безларининг деярли тўлиқ йўқлиги билан ажралиб туради, шунинг учун лаблар об-ҳаво омиллари ва ички муаммоларга дош бериш қийин. Дерматолог, косметолог, пластик жарроҳ Мадина Байрамукова бу ҳақда батафсил сўзлаб берди.
Лабларнинг қуришига олиб келадиган ташқи омиллар
Лабларни тишлашни ва мунтазам равишда намлашни яхши кўрадиганларда ҳамиша бу билан боғлиқ муаммо мавжуд, чунки инсон тупугида терини қуритадиган моддалар мавжуд. Лаблар қуриши шиллиқ қаватни безовта қилувчи аччиқ ёки шўр овқатлардан кейин пайдо бўлиши мумкин. Бундай ҳолда, овқатдан кейин салфеткадан ёки лабни ювиш воситасидан фойдаланиш тавсия этилади.
Таркибида SPF’ни ўз ичига олган махсус маҳсулотсиз тўғридан-тўғри қуёш нурида бўлиш лаблар учун ҳам зарарли. Қуёшда бўлиш нафақат лабларнинг қуриши ва ёрилишига олиб келади, балки кўпинча герпесга ҳам сабаб бўлади. Ёз ва қишда лаблар билан боғлиқ муаммоларнинг олдини олиш учун ташқарига чиқишдан олдин бальзам ёки гигиеник лаб бўёғидан фойдаланишни унутмаслик керак.
Лабларнинг қуриши билан боғлиқ саломатлик муаммолари
ЎРВИ фонида лаблар қуриши юзага келиши мумкин. Бу аломат одатда юқори ҳарорат пасайганидан кейин пайдо бўлади. Унинг сабаби организмнинг сувсизланиши ва иммунитетнинг пасайиши ҳисобланади.
Қуруқ лаблар организмдаги сув етишмаслигининг белгиси бўлиши ҳам мумкин. Шунинг учун, намлантирувчи бальзамдан қанчалик кўп фойдаланилса ҳам, у мувозанатни тиклашга ёрдам бермайди. Шунчаки, етарли даражада оддий сув ичишни назорат қилиш керак.
Бундан ташқари, лабларнинг ҳолати витамин ва элементларнинг сўрилиши каби омилларга ҳам боғлиқ. Витаминлар, хусусан, B12 витамини ва темир етишмаслиги туфайли лаблар бурчагида оғриқли ёриқлар пайдо бўлиши мумкин.
Баъзи маҳсулотлар ёки дори-дармонларга аллергия ҳам лабларнинг қуриши ва оғиз бурчакларида яллиғланишни келтириб чиқариши мумкин. Буйрак функциясининг бузилиши ва гормонал номутаносибликлар, хусусан, гипертиреоз, гипотиреоз, қандли диабет ҳам лабларнинг қуриши ва ёрилишига олиб келиши мумкин.
Изоҳ (0)