Қашқадарё вилоятининг Миришкор тумани ҳокими ўринбосари, ҳокимликда инвестициялар ва ташқи савдо бўлими бошлиғи лавозимида ишлаган Бекзод Боборажабов Сирдарё вилоятида содир бўлган ЙТҲда вафот этгани маълум бўлди. Бу ҳақдаги ахборотни Сирдарё вилоят ЙҲХБ ахборот хизмати тасдиқлади.
Масъул ҳоким ўринбосари ўлимига сабаб бўлган ЙТҲ ҳақиқатан ҳам Сирдарё вилояти ҳудудида содир бўлганини тасдиқлади.
«Тўғри, ЙТҲ айнан Gentra ва Howo юк машинаси иштирокида содир бўлган. ЙТҲнинг қолган тафсилотлари ҳақида ахборот беролмаймиз. Боиси республика бунга рухсат бермайди. Биз бор ахборотни республикага бердик. Улардан оласиз», — деди «Дарё»нинг бу ҳақдаги сўровига жавоб берган Сирдарё вилоят ЙҲХБ ахборот хизмати раҳбари Саидаҳмад Искандарбеков.
«Дарё» бу ҳақда ахборот олиш учун Республика Йўл ҳаракати хавфсизлиги бош бошқармаси ахборот хизмати билан ҳам боғланди. Бошқарманинг Азиз Муродов исмли масъули «Дарё» сўровига жавобан аниқ ахборотни тез орада беришини маълум қилса-да, айтилган фурсатда ахборот бермади. Қайта-қайта қилинган қўнғироқларга ҳам жавоб бермади. Сўнгра Ички ишлар вазирлиги ахборот хизмати раҳбари Шоҳрух Ғиёсов билан боғланиб, масъуллардан ахборот олишда кўмак сўрадик. Бироқ барча уринишлар беҳуда кетди.
Изоҳ (0)