Qashqadaryo viloyatining Mirishkor tumani hokimi o‘rinbosari, hokimlikda investitsiyalar va tashqi savdo bo‘limi boshlig‘i lavozimida ishlagan Bekzod Boborajabov Sirdaryo viloyatida sodir bo‘lgan YTHda vafot etgani ma’lum bo‘ldi. Bu haqdagi axborotni Sirdaryo viloyat YHXB axborot xizmati tasdiqladi.
Mas’ul hokim o‘rinbosari o‘limiga sabab bo‘lgan YTH haqiqatan ham Sirdaryo viloyati hududida sodir bo‘lganini tasdiqladi.
“To‘g‘ri, YTH aynan Gentra va Howo yuk mashinasi ishtirokida sodir bo‘lgan. YTHning qolgan tafsilotlari haqida axborot berolmaymiz. Boisi respublika bunga ruxsat bermaydi. Biz bor axborotni respublikaga berdik. Ulardan olasiz”, — dedi “Daryo”ning bu haqdagi so‘roviga javob bergan Sirdaryo viloyat YHXB axborot xizmati rahbari Saidahmad Iskandarbekov.
“Daryo” bu haqda axborot olish uchun Respublika Yo‘l harakati xavfsizligi bosh boshqarmasi axborot xizmati bilan ham bog‘landi. Boshqarmaning Aziz Murodov ismli mas’uli “Daryo” so‘roviga javoban aniq axborotni tez orada berishini ma’lum qilsa-da, aytilgan fursatda axborot bermadi. Qayta-qayta qilingan qo‘ng‘iroqlarga ham javob bermadi. So‘ngra Ichki ishlar vazirligi axborot xizmati rahbari Shohrux G‘iyosov bilan bog‘lanib, mas’ullardan axborot olishda ko‘mak so‘radik. Biroq barcha urinishlar behuda ketdi.
Izoh (0)