Ўзбекистонда кўп квартирали уйларга туташ ерларда ўзбошимчалик билан иншоотлар қурганлик учун жавобгарлик кучайтирилди

Ўзбекистонда кўп квартирали уйлар конструкцияларини ноқонуний ўзгартирганлик учун жавобгарлик кучайтирилди, деб хабар бермоқда Telegram’даги «Ҳуқуқий ахборот» канали.

Маълум қилинишича, 31 май куни президент томонидан имзоланган қонун билан Маъмурий жавобгарлик тўғрисидаги ҳамда Солиқ кодексларига ўзгартиришлар киритилди.

Унга кўра:

Кўп квартирали уйларни бошқариш қоидаларини бузиш мансабдор шахсларга БҲМнинг 15 баравари (4 миллион 500 минг сўм) миқдорида жарима солишга сабаб бўлади.

Кўп квартирали уйлардаги таянч ва (ёки) тўсиқ конструкцияларни қонунчиликни ҳамда техник жиҳатдан тартибга солиш соҳасидаги норматив ҳужжатларни бузган ҳолда ўзгартириш ва (ёки) реконструкция қилиш, шу жумладан, кўп квартирали уйларда ва кўп квартирали уйларга туташ ер участкаларида ўзбошимчалик билан иморатлар (иншоотлар) қуриш ишларини амалга ошириш:

• фуқароларга БҲМнинг 30 бараваригача (9 миллион сўмгача);
• мансабдор шахсларга 50 бараваригача (15 миллион сўмгача) миқдорда жарима солишга сабаб бўлади.

Маъмурий ҳуқуқбузарлик тўғрисидаги ишлар Уй-жой коммунал хизмат кўрсатиш вазирлиги ҳузуридаги Кўп квартирали уй-жой фондидан фойдаланиш соҳасини назорат қилиш инспекцияси томонидан кўриб чиқилади.

Қонун билан Солиқ кодексига киритилган ўзгартиришларга кўра:

бошқарувчи ташкилотлар ёки кўп квартирали уйларни бошқарувчилар томонидан умумий мол-мулкни бошқариш, унга техник хизмат кўрсатиш ва уни таъмирлаш, шунингдек, кўп квартирали уйларга туташ ер участкаларини ободонлаштириш бўйича кўрсатилаётган хизматлар ҳамда бажарилаётган ишлар бўйича айланма солиқ солишдан озод этилади; бу бўйича кўрсатилган хизматлардан ҳамда бажарилган ишлардан олинган маблағлар солиққа тортилмайди.

Ушбу қонун расмий эълон қилинган кундан эътиборан кучга киради.

Уй-жой коммунал хизмат кўрсатиш вазирлиги инспекцияси бошлиғи Азларжон Содиқов «Дарё» мухбирига берган интервьюсида Ўзбекистонда кўп қаватли уйларда қурилиш қилишнинг қонуний тартиблари бўлса-да, унга кўп фуқаролар амал қилмаслигини айтганди. Унинг сўзларига кўра, Республикада мавжуд 40 мингтага яқин кўп қаватли уйларда 60 мингдан ортиқ ноқонуний қурилмалар бор.

«Ноқонуний қурилмалар нималардан иборат? Мисол учун, кўп квартирали уйнинг 1-қаватида қўшимча қурилиш қилиш, яъни балконни янада ташқарига чиқариш, ертўладан ташқари томондан эшик очиш, ‘подъезд’ларни ўраб олиниши, том қисмларига тасдиқланмаган ҳужжатларсиз қурилмалар қуриш, ертўлалардан тартибсиз фойдаланиш кабилар ноқонуний қурилмалар ҳисобланади.

Бундан ташқари, жуда кўп кузатиладиган муаммо – уйнинг ичига ноқонуний қурилмалар қуриш ҳолатларидир. Масалан, аксарият фуқаролар ошхонани балконга кўчиради. Албатта, бу ноқонуний ҳисобланади. Яна кимдир деворни олиб ташлаб зални балкон билан улаб юборади. Бу ҳам қонунга ҳилоф қурилишдир. Айтиш керакки, бундай қурилишларнинг барчасини ҳужжатларни расмийлаштирган, хавфсизлигига ишонч ҳосил қилган ҳолда, лойиҳа доирасида ва лойиҳанинг тегишли мутасаддиларидан тасдиқлатиб амалга ошириш мақсадга мувофиқ бўлади. Қонунчиликда бундай уйларни реконструция қилишнинг ўз тартиблари бор. Унга амал қилган ҳолда ишни ташкил этиш лозим», – деган эди вазирлик вакили.

Танзила Норбоева Сенатнинг 25-ялпи мажлисида мазкур қонуннинг ҳаётга татбиқ этилиши натижасида коммунал хизмат кўрсатиш соҳасида, шу жумладан, кўп квартирали уйларни сақлаш ва ундан фойдаланишда қонун бузилиш ҳолатларини олдини олишга ҳамда аҳолининг хавфсиз яшашига шароит яратиб берилишига эришилишини таъкидлаганди.