Йўл ҳаракати хавфсизлиги ходимлари иштирокидаги фото ва видеоларни тарқатишни тақиқлашни назарда тутувчи қонун лойиҳаси такомиллаштирилиб ва депутатлар томонидан қайта кўриб чиқилади. Бу ҳақда «Миллий тикланиш» партияси етакчиси Алишер Қодиров маълум қилди.
Унинг сўзларига кўра, ижтимоий тармоқлардаги айрим фойдаланувчилар қонундаги ЙПХ ходимини видеотасвирга олишни тартибга солиш билан боғлиқ 195-моддасини «Миллий тикланиш» фракцияси тўлиқ қўллаб-қувватлади деб аюҳаннос солмоқда.
«Эй барака топкур, ҳовлиқмасдан, тарқатадиган ахборотингни, бироз ўзингни қийнаб тагига етсангчи. Қонун фракцияда биринчи ўқишда маъқулланди. Чунки қонун фақат битта моддадан иборат эмас.
Бу қонун йўллардаги тартибсизликларни келтириб чиқараётган, оилаларга фожиа олиб кираётган бебошларни жиловлашга ва жазолашга хизмат қилиши керак. Низоли ҳолатни видеотасвирга олиш ва ҳуқуқни ҳимоя қилиш мақсадида фойдаланишни (масхаралаш, таҳқирлаш ва бошқа ғараз мақсадларда эмас) ҳеч ким тақиқламоқчи эмас. Жазо ҳам ошириб юборилган, бу ҳам жиддий кўриб чиқилади.
Баъзи ‘хабаршунос валломатлар’ қачонлардир ҳуқуқни муҳофаза қилувчи идоралардан адолатсизлик кўриб, ғазаби ичига тушиб қолган бўлса ҳақини талаб қилишни ўргансин ёки даволансин, чунки ғазаб биринчи навбатда эгасини хонавайрон қилади», — деб ёзади Қодиров.
Алишер Қодировнинг қўшимча қилишича, қонун лойиҳаси Қонунчилик палатасининг ялпи мажлиси кун тартибидан чиқарилган, лекин кейинги мажлисгача тайёрланади ва албатта, кўрилади.
Аввалроқ Халқ демократик партияси Ўзбекистонда Йўл ҳаракати ходимларини видео ва фототасвирга олиб тарқатиш масаласида ҳамда катта миқдорда жарима белгиланиши кўзда тутилган қонун лойиҳаси рад этилганини маълум қилганди.
Изоҳ (0)