Самарқанд шаҳрида тўйдаги овқатдан заҳарланиш ҳолати қайд этилгани ҳақида хабар берилганди. Вилоят санитария-эпидемиологик осойишталик ва жамоат саломатлиги бошқармаси ахборот хизмати «Дарё»га овқатдан заҳарланганлар 19 нафар эканини маълум қилди.
Аниқланишича, 2022 йил 26 май куни Самарқанд шаҳридаги «Яккасарой» тўйхонасида ўтказилган хатна тўйида қатнашганларнинг 19 нафари овқатдан заҳарланиш ташхиси билан шифохоналарга ётқизилган.Жумладан, Жомбой туман тиббиёт бирлашмасига қарашли юқумли касалликлар бўлимига «Олмазор» маҳалласида яшовчи 11 нафар фуқаро, Булунғур туман тиббиёт бирлашмасига қарашли юқумли касалликлар бўлимига «Янгиобод» маҳалласида яшовчи 3 нафар фуқаро, Жомбой туман кўп тармоқли марказий поликлиникасига қарашли «Зарафшон» ҚВПга «Олмазор» МФЙда яшовчи 5 нафар фуқаро мурожаат қилиб, тоби йўқлигини маълум қилган.
«Дастлабки эпидемиологик текширув ва суриштирувлар натижасига кўра, барча беморларда 2022 йил 27 май куни эрталабдан кўнгил айниш, қайд қилиш, қорин соҳасида оғриқ, ич кетиш ва тана ҳароратининг кўтарилиши каби бир хил клиник белгилар кузатилган.
Заҳарланиш сабабларини ўрганиш борасида беморлар ва тўй тадбирига қатнашганлар билан ўтказилган сўров-суриштирувларда фуқаролар ўз касалликлари бошланишини Самарқанд шаҳар «Фарҳод» қўрғонида ўтказилган тўй тадбирида истеъмол қилинган гўштли ассорти маҳсулотлари билан боғлиқлиги аниқланди», — дейилади масъул ташкилоти ахборотида.
Айтилишича, шифохонада беморларга тиббий ёрдам кўрсатилган. Беморлар ошқозони ювилиб, тозаловчи ҳуқна қилинган ва беморлардан олинган биоматериал намуналари лаборатория таҳлили учун Жомбой ва Булунғур туман санитария-эпидемиологик осойишталик ва жамоат саломатлиги бўлимларининг бактериология лабораторияларига юборилган. Беморларда дезинтоксикацион ҳамда симптоматик даво муолажалари ўтказилган.
Қўшимча қилинишича, тўй тадбирида жами 350 нафарга яқин фуқаро иштирок этган. Қатнашганларни аниқлаш борасида ўтказилган уйма-уй кўрик ва суриштирувларда Жомбой туман Олмазор қишлоғида яшовчи 165 нафар фуқаро, Булунғур туман Чангал қишлоғида яшовчи 30 нафар фуқаро ва Жиззах шаҳри «Саройли» МФЙ ҳудудида яшовчи 7 нафар фуқаро тўй тадбирида қатнашгани аниқланди. Жиззах вилоятидан келган фуқаролар тўғрисида Жиззах вилоят санитария-эпидемиологик осойишталик ва жамоат саломатлиги бошқармасига хабар қилинган ва улар томонидан ўрганилганда 7 нафар фуқарода касаллик белгилари аниқланмаган.
«Бугунги кунда касалхонадаги барча беморларнинг ҳолати ижобий тарафга ўзгарди. Даволаш муолажалари мувофаққиятли якунланиб, барча беморлар уй-уйига жавоб берилди ва уларнинг соғлиги кузатувга олинган. ‘Яккасарой’ тўйхонасини ваколатли орган билан келишиш тартибида текшириш ўтказишга белгиланган тартибда буюртма берилди. Шунингдек, мазкур ҳолат юзасидан Самарқанд шаҳар бўйича ИИО ФМБ томонидан терговга қадар текширув ҳаракатлари олиб борилмоқда», — дейилади расмий ахборотда.
Изоҳ (0)