«Реал» кетма-кет 8 марта ЕЧЛ финалида ғалаба қозонди. Сўнгги бор «Ливерпуль» Мадрид жамоасини финалда мағлуб этганди

Мадриднинг «Реал» жамоаси Чемпионлар Лигасида «Ливерпуль»ни мағлуб этиб, бош совринни қўлга киритди.

«Қаймоқранглилар» кетма-кет 8 марта нуфузли мусобақа финалларида зафар қучди.

Мадридликлар шу вақтга қадар 1997/98 йилги мавсум («Ювентус» устидан 1:0 ҳисобида ғалаба), 1999/00 йилги мавсум («Валенсия» устидан 3:0 ҳисобида ғалаба), 2001/02 йилги мавсум («Байер» устидан 2:1 ҳисобида ғалаба), 2013/14 йилги мавсум («Атлетико» устидан 4:1 ҳисобидаги ғалаба), 2015/16 йилги мавсум («Атлетико» билан 1:1 ва пенальтилар сериясидаги ғалаба), 2016/17 йилги мавсум («Ювентус» устидан 4:1 ҳисобидаги ғалаба), 2017/18 йилги мавсумда («Ливерпуль» устидан 3:1 ҳисобидаги ғалаба) чемпионга айланганди.

«Реал» жами 17 марта ЕЧЛ (ЕЧК) финалларида иштирок этган ва 14 марта ғалаба қозониб, 3 марта мағлубиятга учраган. Охирги марта 1981 йилда Чемпионлар Кубогида «Ливерпуль»га енгилганди.

Мадрид клуби сўнгги 9 мавсумда 5 марта Чемпионлар Лигаси совринини қўлга киритди ва бу борада рекорд қайд этди. «Реал» 2014, 2016, 2017, 2018 ва 2022 йилларда ушбу совринни боши узра баланд кўтарди.

Бу вақт оралиғида «Барселона» (2015), «Ливерпуль» (2019), «Бавария» (2020) ва «Челси» (2021) каби жамоалар чемпион бўлишни уддалаганди.

Карло Анчелотти шогирдлари жорий мавсум Чемпионлар Лигаси шоҳсупасига қадар АПЛнинг топ-3 жамоасини мағлуб этди. Мадридликлар чорак финалда «Челси» устидан ғалаба қозонган бўлса, ярим финалда Англия чемпиони «Манчестер Сити» мағлуб этилди. Финалда «Реал» «Ливерпуль»дан устун келди.

Маълумот учун, 2021/22 йилги мавсум АПЛда «Манчестер Сити» чемпионликни қўлга киритди, «Ливерпуль» икки ва «Челси» учинчи ўринларни эгаллади.