“Real” ketma-ket 8-marta YChL finalida g‘alaba qozondi. So‘nggi bor “Liverpul” Madrid jamoasini finalda mag‘lub etgandi

Madridning “Real” jamoasi Chempionlar Ligasida “Liverpul”ni mag‘lub etib, bosh sovrinni qo‘lga kiritdi.

“Qaymoqranglilar” ketma-ket 8-marta nufuzli musobaqa finallarida zafar quchdi.

Madridliklar shu vaqtga qadar 1997/98-yilgi mavsum (“Yuventus” ustidan 1:0 hisobida g‘alaba), 1999/00-yilgi mavsum (“Valensiya” ustidan 3:0 hisobida g‘alaba), 2001/02-yilgi mavsum (“Bayer” ustidan 2:1 hisobida g‘alaba), 2013/14-yilgi mavsum (“Atletiko” ustidan 4:1 hisobidagi g‘alaba), 2015/16-yilgi mavsum (“Atletiko” bilan 1:1 va penaltilar seriyasidagi g‘alaba), 2016/17-yilgi mavsum (“Yuventus” ustidan 4:1 hisobidagi g‘alaba), 2017/18-yilgi mavsumda (“Liverpul” ustidan 3:1 hisobidagi g‘alaba) chempionga aylangandi.

“Real” jami 17 marta YChL (YChK) finallarida ishtirok etgan va 14 marta g‘alaba qozonib, 3 marta mag‘lubiyatga uchragan. Oxirgi marta 1981-yilda Chempionlar Kubogida “Liverpul”ga yengilgandi.

Madrid klubi so‘nggi 9 mavsumda 5 marta Chempionlar Ligasi sovrinini qo‘lga kiritdi va bu borada rekord qayd etdi. “Real” 2014, 2016, 2017, 2018 va 2022-yillarda ushbu sovrinni boshi uzra baland ko‘tardi.

Bu vaqt oralig‘ida “Barselona” (2015), “Liverpul” (2019), “Bavariya” (2020) va “Chelsi” (2021) kabi jamoalar chempion bo‘lishni uddalagandi.

Karlo Anchelotti shogirdlari joriy mavsum Chempionlar Ligasi shohsupasiga qadar APLning top-3 jamoasini mag‘lub etdi. Madridliklar chorak finalda “Chelsi” ustidan g‘alaba qozongan bo‘lsa, yarim finalda Angliya chempioni “Manchester Siti” mag‘lub etildi. Finalda “Real” “Liverpul”dan ustun keldi.

Ma’lumot uchun, 2021/22-yilgi mavsum APLda “Manchester Siti” chempionlikni qo‘lga kiritdi, “Liverpul” ikki va “Chelsi” uchinchi o‘rinlarni egalladi.