Бугун, 28 май куни бўлиб ўтган Сенатнинг 26-ялпи мажлисида Олий суд таркибига ўзгартиришлар киритиш тўғрисидаги масала кўриб чиқилди. Бу ҳақда «Дарё» мухбири хабар бермоқда.
Мажлисда Сенат Турғунали Мирзаев ва Нурали Раҳмоновни Ўзбекистон Республикаси Олий судининг судьяси лавозимига 12 йил муддатга сайлаш тўғрисида қарор қабул қилди.
Маълумот учун, Турғунали Мирзаев 1976 йилда Фарғона вилояти Бувайда туманида туғилган. Миллати ўзбек, маълумоти олий. 2000 йилдан бошлаб Фарғона шаҳар Ички ишлар бошқармаси терговчиси, катта терговчиси ва бўлим бошлиғи лавозимларида ишлаган. 2012 йилдан бошлаб Фарғона вилояти туман суди раиси, вилоят судининг судьяси бўлган. 2021 йилдан Тошкент вилояти Юқори Чирчиқ туман судининг раиси лавозимида ишлаб келган.
Нурали Раҳмонов 1982 йилда Самарқанд вилояти Пахтачи туманида туғилган. Миллати ўзбек, маълумоти олий. Соҳадаги иш фаолиятини дастлаб турли корхоналарда ҳуқуқий маслаҳатчиликдан бошлаган. 2010 йилдан бошлаб Кармана туман судьяси, туманлараро судининг раиси бўлган. 2019 йилдан шу кунга қадар Фуқаролик ишлари бўйича Навоий вилоят суди судьяси лавозимида ишлаб келган.
Эслатиб ўтамиз, бунгача Комилов Козимжон Олий суди раиси сифатида фаолият юритиб келган.
Изоҳ (0)