Сенатнинг 26-ялпи мажлисида Ўзбекистон Марказий банки бошқаруви раисини тайинлаш тўғрисидаги масала кўриб чиқилди. Бу ҳақда «Дарё» мухбири хабар бермоқда.
Мажлисда сенаторлар Мамаризо Нурмуратовни навбатдаги муддатга Марказий банк бошқаруви раиси этиб тайинлаш тўғрисида қарор қабул қилди.
«Ўзбекистон Республикаси Марказий банки бошқаруви раисининг ваколат муддати 5 йилни ташкил қилади. Айни пайтда Марказий банк бошқарув раиси лавозимида ишлаб келаётган Мамаризо Нурмуратов ушбу лавозимга 2017 йилда тайинланган эдилар. Ўзбекистон Республикаси президенти томонидан Мамаризо Нурмуратовни Марказий банки бошқарув раиси лавозимига тайинлаш учун тақдимнома киритилган», – деди Сенат раиси Танзила Норбоева.
Маълумот учун, Мамаризо Нурмуратов 1960 йили Самарқанд вилоятида дунёга келган. 1977 йили Тошкент халқ хўжалиги институтига ўқишга кириб, 1982 йили Ленинград иқтисодиёт-молия институтини тамомлаган. 1985-1988 йилларда Москва Молия институти аспирантурасида таҳсил олган. Иқтисодиёт фанлари номзоди. Мамаризо Нурмуротов 2000–2004 йилларда Ўзбекистон молия вазири бўлган. 2004–2006 йилларда Самарқанд ҳокими лавозимида ишлаган. 2006-2017 йилларда Ўзбекистон Марказий банки раисининг маслаҳатчиси, 2017 йил июндан бошлаб Марказий банк раиси лавозимида ишлаб келмоқда.
Изоҳ (0)