«Коррупцияга оид жиноят содир этган шахслар давлат хизматига олинмайди» — Сенат «Давлат фуқаролик хизмати тўғрисида»ги қонунни маъқуллади

Бугун, 28 май куни Олий Мажлис Сенати томонидан «Давлат фуқаролик хизмати тўғрисида»ги қонун маъқулланди. Бу ҳақда «Дарё» мухбири хабар бермоқда.

Мажлисда Сенат қўмитаси раиси Наримон Умаров сўзга чиқиб, қонун ҳақида гапирди.

«Бу қонун давлат фуқаролик хизматига номзодларни очиқ, мустақил танлов орқали саралаб олиш жараёнини комплекс ҳуқуқий тартибга солишни таъминайди. Шунингдек, давлат фуқаролик хизматчиларини иш самарадорлигини баҳоловчи мезонларни, уларнинг малакасини оширишга бўлган талабларни белгиловчи, тўғридан-тўғри таъсир кучига эга қонун ҳисобланади», – деди сенатор.

Маълум қилинишича, қонунда давлат фуқаролик хизматчиси ўзаро яқин қариндошликда ёки қуда томондан қариндош бўлган шахсларнинг айнан битта давлат органи ва ташкилотида бирга хизмат қилиши мумкин эмаслиги назарда тутилган.

Ҳужжат билан давлат фуқаролик хизмати соҳасида коррупцияга оид ҳуқуқбузарликларнинг олдини олишнинг ҳуқуқий асослари яратилмоқда, яъни давлат хизматчиларининг фаолияти энг муҳим самарадорлик кўрсаткичлари (KPI) асосида баҳоланиши қатъий белгиланмоқда. Коррупцияга оид жиноятларни содир этган шахслар давлат фуқаролик хизматига қабул қилинмайди.

Шу билан бирга, илмий ва ижодий фаолиятдан ташқари ҳақ тўланадиган бошқа фаолият билан, шунингдек тадбиркорлик фаолияти билан шуғулланишга йўл қўйилмаслиги, коррупцияга оид жиноятларни содир этган шахслар давлат фуқаролик хизматига қабул қилинмаслиги назарда тутилмоқда.

Қонунга яна бир қатор муҳим нормалар:

• коррупция хавфи юқори бўлган лавозимларни эгаллаб тйпган давлат фуқаролик хизматчиларининг мажбурий ротация қилиниши;
• хизмат ваколатларини бошқа шахсларнинг манфаатларини кўзлаб бажариш ёки бажармаслик эвазига улардан бирон-бир мукофот, фойда ёки совғалар олиш қатъий та’қиқланиши;
• ўз даромадлари ҳамда мол-мулки тўғрисида декларация тақдим этиши шартлиги;
• Ўзбекистон ҳудудидан ташқарида ҳисобварақлар очишга ва уларга эга бўлишга, чет элда кўчмас мулкка ва бошқа мол-мулкка эгалик қилишга ҳақли эмаслиги;
• одоб-аҳлоқ қоидаларига риоя этиш шартлиги;
• давлат органининг нуфузини туширишга олиб келиши мумкин бўлган ҳаракатлардан тийилиши;
• ўз хизмат мавқеидан шахсий мақсадларда фойдаланмаслиги;
• давлат мулкидан фақат хизмат мақсадларида фойдаланиши шартлиги киритилмоқда.