Senatning 26-yalpi majlisida O‘zbekiston Markaziy banki boshqaruvi raisini tayinlash to‘g‘risidagi masala ko‘rib chiqildi. Bu haqda “Daryo” muxbiri xabar bermoqda.
Majlisda senatorlar Mamarizo Nurmuratovni navbatdagi muddatga Markaziy bank boshqaruvi raisi etib tayinlash to‘g‘risida qaror qabul qildi.
“O‘zbekiston Respublikasi Markaziy banki boshqaruvi raisining vakolat muddati 5 yilni tashkil qiladi. Ayni paytda Markaziy bank boshqaruv raisi lavozimida ishlab kelayotgan Mamarizo Nurmuratov ushbu lavozimga 2017-yilda tayinlangan edilar. O‘zbekiston Respublikasi prezidenti tomonidan Mamarizo Nurmuratovni Markaziy banki boshqaruv raisi lavozimiga tayinlash uchun taqdimnoma kiritilgan”, – dedi Senat raisi Tanzila Norboyeva.
Ma’lumot uchun, Mamarizo Nurmuratov 1960-yili Samarqand viloyatida dunyoga kelgan. 1977-yili Toshkent xalq xo‘jaligi institutiga o‘qishga kirib, 1982-yili Leningrad iqtisodiyot-moliya institutini tamomlagan. 1985-1988-yillarda Moskva Moliya instituti aspiranturasida tahsil olgan. Iqtisodiyot fanlari nomzodi. Mamarizo Nurmurotov 2000–2004-yillarda O‘zbekiston moliya vaziri bo‘lgan. 2004–2006-yillarda Samarqand hokimi lavozimida ishlagan. 2006-2017-yillarda O‘zbekiston Markaziy banki raisining maslahatchisi, 2017-yil iyundan boshlab Markaziy bank raisi lavozimida ishlab kelmoqda.
Izoh (0)