Дахлсизлигидан маҳрум этилиб, қилган жиноятлари учун 5 йил муддатга озодликдан маҳрум қилинган Халқ депутатлари Андижон шаҳар кенгашининг собиқ депутати Шуҳрат Каримов томонидан ноқонуний қурилгани айтилган бинолар МИБ томонидан бузиб ташланмоқда Бу ҳақда «Дарё» мухбири хабар берди.
МИБнинг Андижон вилояти бошқармаси маълумотига кўра, Фуқаролик ишлари бўйича Андижон туманлараро судининг 2021 йил 22 июндаги ижро ҳужжатига асосан «Alliance роад cонструcтион» МЧЖга ажратиб берилган 4 гектар ер майдонидан ташқари ортиқча 1,26 гектар ер майдонига қурилган 17 та ҳар бири 400 кв.метрдан иборат қурилиши тугалланмаган бинолар, 5 та ҳар бири 400 кв.метрдан иборат ер майдонидаги бетон фундамент қурилмалар жамият таъсисчиси Шуҳрат Каримов ҳисобидан буздирилиши белгиланган.
Мазкур ижро ҳужжатининг ижросини таъминлаш мақсадида 2021 йилнинг 11 ноябрь куни мажбурий ижро ҳаракатлари тайинланган ҳамда ижро ҳужжатининг ижросини ихтиёрий равишда бажариши учун қарздор жамиятга муддат берилган. Шу сабабли ижро иши кейинга қолдирилган.
Бироқ Бюро ходимлари томонидан тарафлар бир неча бор огоҳлантирилган бўлишига қарамасдан, ноқонуний қурилмалар ихтиёрий равишда буздирилмаган. Шундан сўнг, мажбурий ижро ҳаракатларига киришилган.
2022 йилнинг 19 май куни олиб борилган ижро ҳаракатлари давомида 1,26 гектар ер майдонига қурилган қурилиши тугалланмаган бинолар бузилиши бошланган. Ҳозирда ижро ҳаракатлари давом этмоқда.
Эслатиб ўтамиз, Халқ депутатлари Андижон шаҳар кенгашининг 2021 йил 17 майдаги сессиясида бир гуруҳ депутатлар тинтувдан ўтказилгани, сессияда Андижонда ер сотувчиларнинг кирдикорларини фош қилган депутат прокурор тақдимномасига кўра, дахлсизлик ҳуқуқидан маҳрум қилингани маълум қилинганди.
«Дарё» мухбири вазиятга ойдинлик киритиш мақсадида журналистик суриштирув ўтказганди. Шуҳрат Каримов «Дарё» мухбирига берган интервьюсида депутат сифатида қонун ва қонуности ҳужжатлар ижросини халққа етказиш ва ижросини назорат қилишга ҳаракат қилгани, шу сабабли бир қатор ташкилотларга тегишли тартибда депутатлик сўровлари юборгани, бу эса мутасаддиларга ёқмаганини билдирганди.
Андижон шаҳар ҳокими Баҳром Ҳайдаров эса депутат Шуҳрат Каримов ўзига ажратилган тўрт гектар ер майдони атрофидаги қўшимча олти гектарни ҳам ноқонуний қўшиб олгани, ўзига бириктирилган ердан кўп қаватли уйлар, коттежлар, маиший хизмат бинолари қуриши керак бўлган бўлса-да, белгиланган ишлар амалга оширилмагани таъкидлаган.
Орадан бир ой ўтиб, дахлсизлик ҳуқуқидан маҳрум қилинган депутат Жиноят ишлари бўйича Избоскан тумани судининг 2021 йил 23 июндаги ажримига мувофиқ Жиноят кодексининг 168-моддаси 3-қисми «б» (фирибгарлик) банди ва бошқа моддалар билан гумон қилиниб, унга нисбатан қамоққа олиш эҳтиёт чораси қўлланилгани хабар қилинганди.
«Дарё» мухбирининг аниқлаштиришича, дахлсизлик ҳуқуқидан маҳрум бўлган депутат 2021 йилнинг ноябрь ойида 5 йил 2 ой муддатга озодликдан маҳрум қилинган.
Изоҳ (0)