Ижтимоий тармоқларда фойдаланилган электр энергиясининг 200 киловаттдан ортган қисми учун 7,5 минг сўмдан тўловлар амалга оширилиши тўғрисида хабарлар тарқалди. Энергетика вазирлиги мазкур ҳолатга муносабат билдириб, бунинг мутлақо ёлғон эканини маълум қилди.
Вазирлик истеъмолчилардан бу каби тасдиқланмаган хабарларга ишонмасликни сўраган.
Маълум қилинишича, айни кунларда аҳоли ва иқтисодий тармоқларини сифатли ва узлуксиз электр энергияси ҳамда табиий газ билан таъминлаш мақсадида энергетика соҳасини ислоҳ қилишга қаратилган Вазирлар Маҳкамасининг «Ёқилғи-энергетика ресурсларининг нархлари ва тарифларини ўзгартириш тўғрисида»ги қарор лойиҳаси иш жараёнида ва ҳужжатнинг лойиҳаси муҳокама учун «Regulation.gov.uz»га жойлаштирилади ҳамда барчанинг фикр ва таклифлари кўриб чиқилади.
«Шу билан бир қаторда, ижтимоий тармоқ админларидан бу каби асоссиз ва тасдиқланмаган хабарларни тарқатганлик учун тегишли қонунчилик ҳужжатларида жавобгарлик белгиланганлигини эслатиб ўтамиз», — дейилади муносабатда.
Аввалроқ энергетика вазири ўринбосари Шерзод Хўжаев «Дарё» нашрига берган интервьюсида Ўзбекистонда ишлаб чиқарилаётган ва аҳоли хонадонлари учун сотилаётган электр энергияси давлатга молиявий зарар келтираётганини маълум қилганди. Унинг сўзларига кўра, аҳоли хонадонлари учун бугунги кундаги мавжуд тариф 1 киловатт соат электр энергияси учун 295 сўмни ташкил этади. Ишлаб чиқариш ва ташиш харажатларининг барчаси қўшилса, харажатларимиз ўрта ҳисобда 400 сўмдан ошади.
Изоҳ (0)