Ҳакамни калтаклаган «Навбаҳор» футзал жамоаси вакиллари 2 йилга четлатилди

Ўзбекистон футбол ассоциацияси Тартиб-интизом қўмитасининг навбатдаги йиғилиши бўлиб ўтди. Унда сўнгги турлар доирасида бўлиб ўтган учрашувлардаги интизомий ишлар кўриб чиқилгани, қабул қилинган қарорлар бўйича баёнот берилди.

Футзал Олий лигаси 12-тури доирасидаги «Навбаҳор»—«Металлург» учрашувининг 40-дақиқасида ҳакам томонидан «Навбаҳор» ўйинчиси Дониёр Сотволдиевга қизил карточка кўрсатилади. Шундан сўнг Наманган жамоаси футболчиси Илҳом Юсупжонов учрашув ҳаками олдига бориб, ўз эътирозларини қўпол тарзда билдиради ва унга нисбатан куч ишлатади. Шунингдек, жамоа аъзолари ва бошқалар томонидан жанжалли ҳолатни бартараф этиш чоралари кўрилаётган вақтда яна бир «Навбаҳор» футболчиси Ғуломжон Мамажонов ҳам учрашув ҳакамига нисбатан куч ишлатади. Мазкур учрашув интернет орқали тўғридан-тўғри эфирда намойиш этилаётгани, кейинчалик ушбу ҳолат акс эттирилган видеоёзув ижтимоий тармоқларда тарқалган ва кенг жамоатчилик томонидан жиддий эътирозларга сабаб бўлган.

Ўзбекистон футбол ассоциацияси Интизом кодексининг 5.48, 5.49-бандига асосан «Навбаҳор» футболчилари Илҳом Юсупжонов ва Ғуломжон Мамажоновга нисбатан 2 йил муддатга футбол билан боғлиқ ҳар қандай фаолиятдан четлаштириш ва жарима интизом чораси қўлланилди.

«Навбаҳор» клуби 2022 йилги мавсумда Ўзбекистон профессионал футбол лигаси томонидан ўтказиладиган мусобақалар регламентининг 16.2, 16.3, 16.4-бандларига риоя қилинмагани учун клубга ҳам жарима интизом чораси қўлланилди.

Шунингдек, Ўзбекистон Суперлигасининг 10-туридан ўрин олган «Қизилқум»—«Сурхон» учрашувнинг 54-дақиқасида меҳмонлар футболчиси Иқболжон Маликжонов бош ҳакам томонидан огоҳлантирилгандан сўнг ён ҳакам шаънига ҳақоратли сўзлар ишлатгани учун қизил карточка билан жазоланган. Тартиб-интизом қўмитасининг қарорига кўра, Иқболжон Маликжоновга нисбатан 3 та ўйинга дисквалификация қилиш ва жаримага интизом чораси қўлланилди.

Суперлиганинг 10-тури доирасидаги «Динамо»—«ОКМК» учрашувнинг 90+5-дақиқасида олмалиқликлар жамоаси мураббийи Павел Бугало ён ҳакам шаънига ҳақоратли сўзлар ишлатгани учун қизил карточка билан жазоланган. Тартиб-интизом қўмитасининг қарорига кўра, Павел Бугалога нисбатан 2 та ўйинга дисквалификация қилиш ва жарима интизом чораси қўлланилди.

U-21 Биринчилиги 9-тури доирасидаги «Сурхон»—«Сўғдиёна» учрашувининг 78-дақиқасига келиб «Сурхон» жамоаси футболчиси Асилбек Темиров ўйин тўхтатилган вақтда рақиб ўйинчисининг кўкрак қисмига ургани ва тажовузкор хатти-ҳаракати учун қизил карточка билан жазоланган. Тартиб-интизом қўмитасининг қарорига кўра, Асилбек Темировга нисбатан 3 та ўйинга дисквалификация ва жарима интизом чораси қўлланилди.

Биринчи лига 6-тури доирасидаги «Арал»—«Чиғатой» учрашувининг 90-дақиқасига келиб ўйин тўхтатилган вақтда «Арал» жамоаси футболчиси Асад Жуманмуратов рақиб ўйинчисига нисбатан қилган тажовузкор хатти-ҳаракати учун қизил карточка билан жазоланган. Тартиб-интизом қўмитасининг қарорига кўра, Асад Жуманмуратовга нисбатан 3 та ўйинга дисквалификация ва жарима интизом чораси қўлланилди.

Аёллар Олий лигаси 7-тури доирасидаги «Қизилқум-W»—«Нефтчи-W» учрашувининг 90+2-дақиқасида «Қизилқум-W» жамоаси футболчиси Эъзоза Шарипова жамоасига нисбатан ўйин қоидаси бузилгандан сўнг рақиб ўйинчиси шаънига ҳақоратли сўзлар ишлатган ва қизил карточка билан жазоланган. Тартиб-интизом қўмитасининг қарорига кўра, Эъзоза Шариповага нисбатан 3 та ўйинга дисквалификация қилиш чораси қўлланилди.

ЎФА Тартиб-интизом қўмитаси