ОАВ: Жонсон Зеленскийга Россияга қарши янги халқаро альянс тузишни таклиф қилди

Буюк Британия бош вазири Борис Жонсон Европа иттифоқи муқобилига айланувчи сиёсий, иқтисодий ва ҳарбий альянс тузишни таклиф қилди. Бу ҳақда Италиянинг Corriere della Sera газетаси ўз манбаларига таяниб маълум қилди, деб ёзади «РБК».

Жонсон ўз ғоясини биринчи марта Украина президенти Владимир Зеленский билан 9 апрель куни Киевда бўлиб ўтган учрашувда айтган. Британия бош вазири фикрича, альянсга Евроиттифоқ сиёсатидан, шунингдек, Германиянинг Россия «ҳарбий тажовузи»га жавобидан норози бўлган мамлакатларни бирлаштиради. Альянсга Буюк Британия раҳбарлик қилади, шунингдек, унга Украина, Польша, Эстония, Латвия ва Литва, кейинроқ Туркия ҳам кириши керак.

Манбаларга кўра, бу «миллий суверенитетни жонкуярлик билан ҳимоя қиладиган», иқтисодиётга либерал ёндашадиган ва «Москва томонидан ҳарбий таҳдидга нисбатан максимал муросасиз позицияни кўрсатиш қатъиятига тўла» давлатлар иттифоқи бўлади.

Лондон ва Киев музокаралари давом этмоқда: Украина ҳукумати бу ғояга нисбатан аниқ бир позициясини билдиргани йўқ, аммо уни рад этгани ҳам йўқ. Газета маълумотларига кўра, Зеленский 23 июнь куни бўлиб ўтадиган Евроиттифоқ саммитини кутмоқда, унда иштирокчилар Украинанинг ташкилотга аъзо бўлиш ҳақидаги аризасини муҳокама қилади. Киев учрашув якунларига кўра Евроиттифоқ аъзолисига номзод мақомини қўлга киритишга умид қилмоқда.

2014 йилда Украина ва Евроиттифоқ ассоциация ҳақида битим имзолаган. Украинанинг Евроиттифоққа интилиши 2019 йилдан буён мамлакат Конституциясига қайд этиб қўйилган. 28 февраль куни, Россия ҳарбий операциясидан бир неча кун ўтиб, Украина президенти Владимир Зеленский мамлакатнинг Евроиттифоққа кириши ҳақидаги аризани имзолади ва уни «зудлик билан» маъқуллашни сўради.