Қирғизистонда «Россия 24», «Россия Култура» ва «Звезда» телеканаллари вақтинчалик трансляция қилинмаяпти, деб ёзади «РБК» маҳаллий «Акнет» телепровайдерига таяниб.
Узатиш тўхтатиб қўйилиши сабаби сифатида «қатор мамлакатларда умумроссия телеканаллари тарқатилиши бўйича қонуний чекловлар» қабул қилиниши туфайли уларни узатиш «халқаро сунъий йўлдошларда бир томонлама тартибда блоклаб қўйилгани» айтилди.
«Айни пайтда сигнални барқарор узатиш учун захира трансляциясини ташкил қилиш бўйича ишлар олиб борилмоқда. Телеканаллар оператори томонидаги ишлар якунланиши билан, бизнинг тармоқ орқали узатиш тикланади», — дейилади провайдер хабарида.
Туркманистонда ҳам Россиянинг «Россия 1» ва «Звезда» телеканаллари трансляцияси блокланди. Ушбу каналлар ёқилганида чиқаётган эълонга кўра, хорижий сунъий йўлдошлардан умумроссия телеканаллари трансляцияси бўйича чекловлар туфайли телеканал трансляцияси блокланган. Захира трансляциясини ташкиллаштириб, тез орада узатишни қайта тиклашга ваъда берилди.
ВГТРК (Умумроссия давлат телевизион ва радиоузатув компанияси)га қарши санкцияларни май ойи бошида Буюк Британия эълон қилган эди. Нафақат давлат медиахолдингининг ўзи, балки журналистлар ҳам чекловларга учради. Шундан кейин Россия ТИВ Британия элчисини чақириб, норозилик билдирди ва жавоб чоралари кўришга ваъда берди.
Уруш бошланганидан кейин, шунингдек, Евроиттифоқ, Австралия ва бошқа мамлакатлар ҳам уларга қарши санкциялар киритди. АҚШда Биринчи канал, «Россия-1» ва НТВ санкцияга учради. Санкциялар туфайли сунъий йўлдошлар эгалари бир томонлама тартибда ушбу телеканаллар узатилишини ўчириб қўя бошлади.
Изоҳ (0)