Истанбул полицияси махфий халқаро операция ўтказиб, унинг давомида ИШИДнинг янги раҳбари Абу Ҳасан ал-Қурайшийни қўлга олишга муваффақ бўлди. Туркиянинг Oda TV портали хабарига кўра, шу тариқа ташкилотга оид муҳим маълумотлар қўлга киритилган.
Портал маълумотларига кўра, Туркия полицияси ўтган ҳафта ИШИДнинг янги етакчиси Истанбулда эканидан хабар топиб, бир неча кун давомида у яшаган жойни кузатган. Истанбул разведка ва терроризмга қарши кураш бошқармаси гуруҳлари томонидан Абу Ҳасан ал-Қурайшийни қўлга олиш бўйича халқаро операция ўтказилган. Унга Истанбул полицияси бошлиғи Зафер Акташ бошчилик қилган.
Ҳибсга олингандан сўнг ИШИД етакчиси терроризмга қарши кураш хизмати ва миллий разведка ташкилоти экспертлари гуруҳлари томонидан сўроққа тутилган. Туркия президенти Ражаб Тоййиб Эрдўғон яқин кунларда операция тафсилотларини эълон қилади, деб ёзмоқда портал.
ИШИДнинг сўнгги раҳбари Абу Иброҳим ал-Ҳошимий ал-Қурайший 2022 йил 3 февралда ўлдирилган эди. У маҳбуснинг акаси бўлган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)