Тошкент шаҳридаги 12 хонали ҳовли МИБ томонидан қарийб 4 млрд сўмга аукционга қўйилди

Тошкент шаҳар Шайхонтоҳур туманидаги ҳовли кимошди савдосига қўйилди. Лот маълумотлари «E-auksion» порталида эълон қилинган.

Лот аукционга фуқаролик ишлари бўйича суд ҳукми билан Шайхонтоҳур тумани МИБ томонидан жойлаштирилган. 1994 йилда қурилган 1 қаватли уй 12 хонадан иборат. 

Ер участкасининг умумий майдони — 0,16 гектар. Бинонинг майдони — 654 квадрат метр. Ҳовлида газ, сув, электр таъминоти ва канализация тизими мавжуд.

Аукционга қўйилган ҳовлининг бошланғич баҳоси — 3,9 млрд сўм. Аризалар 27 июнь 09:00 га қадар қабул қилинади. Савдолар худди шу куни 10:00 да бошланади.

Лот изоҳида ёзилишича, уй ичидаги жиҳозлар сотувга қўйилмаган, гаровга фақатгина кўчмас мулк қўйилган.

Аввалроқ «Дархон»даги икки қаватли бинонинг бир қисми қарийб 25 млрд сўмга аукционга қўйилгани ҳақида хабар берилган эди.