Конституциянинг 9 та моддасига ўзгартириш ва қўшимчалар киритиш юзасидан таклифлар келиб тушган. Бу ҳақда 26 май куни Конституциявий комиссиянинг биринчи йиғилишида комиссия йиғма ахборот-таҳлил гуруҳининг раҳбари Мирафзал Миракулов маълум қилинди, деб хабар бермоқда «Дарё» мухбири.
Мирафзал Миракуловнинг айтишича, келиб тушган таклифлар Конституциянинг 13, 15, 29, 37, 40, 41, 53, 78, 80-моддалари билан боғлиқ.
«Хусусан, инсоннинг давлат органлари билан ўзаро муносабатларида барча қарама-қаршиликлар ва ноаниқликлар инсон фойдасига талқин қилиниши бўйича таклифлар келган. Шунингдек, Конституциянинг олий юридик кучга эга бўлиб, тўғридан-тўғри амал қилиши керак, яъни судларимиз ҳам, давлат органлари ҳам Конституцияга бевосита амал қилишлари ёзиб қўйилиши керак деган таклифлар келиб тушмоқда. Бундан ташқари, ҳар кимнинг ахборот ресурслари, коммуникация технологиялари ва интернетдан эркин фойдаланиш ҳуқуқига эгалиги ҳам Конституцияда алоҳида қайд қилиниши керак, буни ҳам лойиҳага киритиш бўйича таклифлар келмоқда», — дейди Мирафзал Миракулов.
Таъкидланишича, ҳар бир шахснинг хавфсизлик ва гигиена талабларига жавоб берадиган адолатли ва қулай меҳнат шароитларида ишлаши бўйича ҳам таклифлар келмоқда. Шунингдек, фуқаро энг кам ойлик иш ҳақидан кам бўлмаган тарзда тақдирланиш ҳуқуқига эга бўлиш бўйича таклифлар келган.
« ‘Меҳнатга ҳақ тўлашнинг энг кам миқдори инсоннинг нафақат ўзи, балки оиласини ҳам ҳаёт кечириши учун етарли миқдорда бўлиши керак, буни Конституцияда ёзиб қўйинглар’, деган таклифлар ҳам келиб тушмоқда. Шу билан биргаликда «давлатни аҳоли ижтимоий эҳтиёжманд қатламларини ишга жойлаштириш бўйича қўшимча кафолатларни Конституцияда ёзиб қўйиш керак, ижтимоий давлатнинг муҳим белгиларидан бири», — деган таклифлар ҳам мавжуд. Давлатнинг ишсизлик ва камбағалликни тугатиш учун ўзининг барча имкониятларидан фойдаланиш мажбурияти бўйича таклифлар келиб тушмоқда. Яна фуқароларнинг тиббий ёрдамни қонунда белгиланган, кафолатланган ҳажмини бепул олишга ҳақлилиги алоҳида қайд қилиниши бўйича таклифлар келиб тушган», — дейди Конституциявий комиссия йиғма ахборот-таҳлил гуруҳи раҳбари.
Унинг айтишича, соғлиқни сақлашнинг барча турлари, хусусан, санитария-эпидемиологик осойишталик ва тиббий суғуртани яхшилаш бўйича таклифлар бор.
«Ҳар бир инсоннинг соғлом ва қулай атроф-муҳитга, унинг ҳолати ҳақидаги ҳаққоний ахборотга эга бўлиш ҳамда ўз соғлигига ёки мулкига экологик ҳуқуқбузарлик туфайли етказилган зарарнинг ўрни қопланиши ҳуқуқига эгалиги юзасидан таклифлар келган. Давлат ҳар бир болани умумий ўрта таълим мактабда ўқиши учун давлатга қарашли мактабгача таълим муассасаларида умумий ўрта таълимга тайёрлаш бўйича мажбурий 1 йиллик тайёргарликдан ўтиш ҳуқуқини кафолатлаши лозимлиги, давлат иқтидорли ёшларни уларнинг моддий аҳволидан қатъи назар, таълимни давом эттиришни кафолатлаши керак деган таклифлар ҳам келиб тушмоқда», — дея қўшимча қилади комиссия вакили.
Мирафзал Миракулов олий таълим ва илмий тадқиқот муассасаларини қонунда белгиланган доирада эркинлик берилиши кераклиги юзасидан таклифлар келганини айтди.
Қайд этилишича, ҳеч бир шахс ўзининг мулкидан суд қарорисиз маҳрум этилиши мумкин эмаслиги бўйича таклифлар келган. Бундан ташқари, мулкни жамоат эҳтиёжлари учун мажбурий равишда бошқага ўтказиш қонунда назарда тутилган истисно ҳолатларда ҳамда унга мулкнинг ўрни олдиндан ва тенг миқдорда қопланган тақдирдагина амалга ошириш юзасидан таклифлар бор.
«Давлат хусусий тадбиркорликни ривожлантириш учун қулай ишбилармонлик ва инвестициявий муҳит ҳамда шароитларни таъминлаши, иқтисодий фаолиятда инсофсиз рақобатга, монополлаштиришга йўл қўйилмаслиги ҳам баралла янграмоқда», — дейди у.
Эслатиб ўтамиз, 20 май куни Ўзбекистон Конституциясига ўзгартириш киритиш ва ташкилий чора-тадбирларни амалга ошириш юзасидан Конституциявий комиссия тузилиб, унинг таркиби ва вазифалари белгиланганди.
26 май куни Конституциявий комиссиянинг дастлабки йиғилишида фуқароларнинг таклифлари билан ишлаш механизми маълум қилинди.
Изоҳ (0)