Конституцияга ўзгартириш ва қўшимчалар киритиш бўйича энг кўп таклифлар ижтимоий масалаларга қаратилган. Бу ҳақда 26 май куни ўтказилган Конституциявий комиссиянинг оммавий ахборот воситалари вакиллари учун брифингида комиссия раиси Акмал Саидов маълум қилди, деб хабар берди «Дарё» мухбири.
Акмал Саидовнинг айтишича, Конституцияни ўзгартириш юзасидан биринчи тушган таклифлар амалдаги 9 та моддага тааллуқли.
«Бир қисми соф юридик ҳарактердаги таклифлар, айниқса Конституциянинг тўғридан-тўғри қўлланилишини таъминлаш бўйича. Чунки ҳозирги кунда Олий суддан ташқари, бирорта оддий туман, вилоят судлари Конституцияга ҳавола қилмайди. Олий суд пленумининг қарорларида бор конституцияга ҳавола қилиш. Шунинг учун айтиляптики, агар имкон бўлса оддий туман суди ҳам конституцияга ҳавола қилса, бу конституциянинг тўғридан-тўғри ҳаракат қилишини кўрсатиш мумкин. Кейин Конституциянинг олий юридик кучга эга эканлигига урғу бериляпти. Ўзбекистонда ҳеч бир қонун конституцияга зид бўлиши керак эмас», — дейди у.
Конституциявий комиссия раисининг таъкидлашича, энг кўп таклифлар ижтимоий масалаларга қаратилган.
«Биз Конституциядан Ўзбекистоннинг ижтимоий давлат эканлигини кўрсатишимиз керак. Ҳаракатлар стратегияси ҳамда Янги Ўзбекитоннинг тараққиёт стратегияси доирасида амалга оширилаётган аниқ, манзилли ижтимоий-сиёсат, албатта, Конституцияда бўлиши керак. Конституциямизда «Ўзбекистон ижтимоий давлат» деган тушунча мустаҳкамланмаган. Ўзбекистон демократик Республика деган тушунчалар бор, лекин Ўзбекистон ижтимоий давлат эканлиги мустаҳкамланмаган. Аҳолининг соғлигини сақлашни, таълим бўлган ҳуқуқларини ёки аҳолининг турли ҳимояга мухтож қатламларини, булар тўғрисидаги масалалар мустаҳкамланиши ҳам керак», — дейди Акмал Саидов.
Унинг қўшимча қилишича, комиссиямизнинг кейинги мажлисида барча масалалар моддама-модда кўриб чиқилади.
«Бу ислоҳот — ҳар бир Ўзбекистон фуқаросига тааллуқли. Бирорта инсон конституциясиз ҳаётини тасаввур қилиши мумкин эмас. Ҳар бир инсондан хоҳлардикки «менинг конституциям» деган эътиқодни шакллантиришимиз керак бўлади. 2022 йил учун энг улкан сиёсий воқеа — Ўзбекистон Конституциясига киритиладиган ўзгартириш ва қўшимчалар бўлади. Аввалроқ айтган гапим ОАВларда тарқаб кетибди. Ҳақиқатанам ҳозирги дунёдаги энг асосий шарпа — конституциявий ислоҳотлар шарпаси. Нима учун Маркс ва Энгельсни айтдим, улар Европада коммунизм шарпаси кезиб юрганини айтишган. Мен бутун дунёда Конституциявий ислоҳотлар инсониятнинг диққат марказида. Ўзбекистон ҳам умумжаҳон тараққиёт тенденциялари йўлидан боряпти», — дейди Конституциявий комиссия раиси.
Эслатиб ўтамиз, 20 май куни Ўзбекистон Конституциясига ўзгартириш киритиш ва ташкилий чора-тадбирларни амалга ошириш юзасидан Конституциявий комиссия тузилиб, унинг таркиби ва вазифалари белгиланганди.
24 май куни Конституциявий комиссия раиси Акмал Саидов «Инсон қадри» онлайн платформаси ва «2022-2026 йилларга мўлжалланган Янги Ўзбекистоннинг тараққиёт стратегияси» тўплами тақдимотида сўзлаган нутқида бутун дунёда Конституциявий ислоҳотлар шарпаси кезиб юргани ҳақида айтган эди.
26 май куни Конституциявий комиссиянинг дастлабки йиғилишида фуқароларнинг таклифлари билан ишлаш механизми маълум қилинди.
Изоҳ (0)