Мариуполдаги «Азовсталь» заводида таслим бўлган украиналик ҳарбийларнинг барчаси ҳозир Донецк халқ республикаси ҳудудида, уларни ўша ерда ҳарбий судга тортиш режалаштирилган, деди республика раҳбари Денис Пушилин.
«Азовсталь’ маҳбуслари ДХР ҳудудида сақланмоқда. Республика ҳудудида халқаро трибунал ташкил этиш ҳам режалаштирилган. Ҳозирда трибунал низоми ишлаб чиқилмоқда», — деди Пушулин «Интерфакс»га.
«Азовсталь» заводи икки ой давомида Мариуполдаги украиналик ҳарбийларнинг сўнгги қаршилик маркази бўлиб турди. 16 май куни заводда мудофаани ушлаб турган ҳарбийлар таслим бўлишни бошлади. Украина томони «Азовсталь» ҳимоячиларини тез орада Киев назоратидаги ҳудудга қайтаришни ваъда қилди.
20 май куни Россия Мудофаа вазирлиги «Азовсталь» ҳудуди ва бутун Мариупол россиялик ҳарбийларнинг тўлиқ назорати остига олинганини маълум қилди. Вазирлик маълумотларига кўра, Украинанинг «Азов» полки ва Қуролли кучлари ҳарбий хизматчиларидан жами 2439 киши таслим бўлган. Хабар қилинишича, ярадорлар Новоазовск шаҳридаги касалхонага, қолганлари Еленовка қишлоғига (иккаласи ҳам ДХРда) юборилган.
Шу билан бирга, Россия Тергов қўмитаси «Азовсталь»нинг таслим бўлган ҳимоячиларини сўроқ қилишини маълум қилди, Давлат Думаси спикери Вячеслав Володин эса «Азов» жангчиларини алмашишни тақиқлашни таклиф қилди ҳамда улар «нацист жиноятчилар» эканини, судга тортилиши кераклигини таъкидлади.
Изоҳ (0)