Бельгияда 20 май куни маймунчечак билан касалланганлар учун мажбурий 21 кунлик карантин жорий қилинди. Бу ҳақда мамлакат соғлиқни сақлаш вазири Франк Ванденбрук маълум қилди, деб ёзади «РБК».
Унинг сўзларига кўра, маймунчечак вирусига чалинганлар «пустулалар (ичига йиринг тўпланган пуфакчалар) битиб кетгунича» изоляцияда бўлиши керак.
Касалланганлар билан мулоқотда бўлганлар 21 кунлик карантинга кириши шарт эмас, аммо улар уч кун мобайнида ўз аҳволини кузатиб туриши керак (инкубация даври 5 кундан 21 кунгача).
Аввалроқ Бельгияда маймунчечак билан касалланиш бўйича тўртинчи ҳолат аниқлангани хабар берилганди.
Жаҳон соғлиқни сақлаш ташкилоти бутун дунёда 13 майдан 21 майга қадар 92 кишида маймунчечак аниқланганини маълум қилди. Яна 28 киши касаллик борлиги гумон қилинмоқда. Ҳозирча бирорта ҳам ҳолат ўлим билан тугамаган.
Касалланиш ҳолатлари 12 та мамлакатда қайд этилган. Топ учталикка Португалия, Испания ва Буюк Британия кирди (21 дан 30 тагача ҳолат). Шунингдек, вирусни юқтирганлар Австралия, Бельгия, Канада, Франция, Германия, Италия, Нидерландия, Швеция ва АҚШда ҳам аниқланган.
Маймунчечак — камёб юқумли касаллик бўлиб, асосан Марказий ва Ғарбий Африканинг олис туманларида энг кўп тарқалган. Унинг белгилари — кўнгил айниши, иситма, тошма, қичишиш, шунингдек, мушаклардаги оғриқ. Бу минтақадан ташқаридаги касалланиш ҳолатлари кўпинча эпидемиология нуқтаи назаридан ноқулай бўлган зоналарга сафарлар билан боғлиқ бўлади.
Вирус контакт орқали юқади, аммо унинг тарқалиш даражаси юқори эмас.
Изоҳ (0)