Пентагон ва Давлат департаменти Америка элчихонасини ҳимоя қилиш учун Киевга АҚШ махсус бўлинмалари ҳарбий хизматчиларини юбориш масаласини муҳокама қилмоқда. Бу ҳақда The Wall Street Journal ўз манбаларига таяниб хабар берди.
Агар шундай қарор қабул қилинса, махсус топшириқли бўлинма фақат дипломатларни қўриқлаш билан шуғулланади, дейилади хабарда.
Бундан ташқари, Америка ҳукумати Украинада денгиз пиёдалари бўлиб туриши амалиётини қайта тиклаш вариантларини кўриб чиқмоқда, улар қоидага кўра, АҚШнинг бутун дунё бўйлаб дипломатик ваколатхоналарини қўриқлайди.
АҚШнинг Украинадаги элчихонаси 18 май куни уч ойлик танаффусдан кейин ўз фаолиятини қайта бошлаган эди. Айни пайтда дипломатик миссия вакили Дениел Лангенкамп консуллик фаолияти дарҳол тикланмаслигини, чунки Давлат департаментининг сафарларни тақиқлаш ҳақидаги тавсиялари бутун Украина бўйлаб ҳамон амал қилаётганини айтганди.
Россиянинг Украинадаги ҳарбий операцияси бошланишидан ўн кун аввал — 14 февраль куни АҚШ Украинадаги элчихонасини Киевдан Львовга вақтинчалик кўчиришга қарор қилганди. АҚШ давлат котиби Энтони Блинкен ушбу қарор дипломатик ваколатхона ходимлари хавфсизлиги юзасидан қабул қилинганини айтганди. 22 февраль куни элчихона Польшага кўчгани маълум бўлди.
Мавзуга доир:
- Reuters: АҚШ Украинани кемага қарши ракеталар билан қуроллантиришни режалаштирмоқда
- АҚШ сенати Украинага 40 млрд доллар миқдорида ёрдам ажратилишини маъқуллади
- АҚШ ва Россия мудофаа вазирлари Украинада уруш бошланганидан бери илк бор музокара ўтказди. Пентагон Украинадаги ҳарбий ҳаракатларни зудлик билан тўхтатишни сўрамоқда
- Украина Америка разведкасининг маълумотлари ёрдамида Россия қўмондонлик пунктларига зарба бермоқда — NYT
Изоҳ (0)