Чорва молларини боқиш мақсадида тоғли ҳудудларга жўнаб кетиб, бедарак йўқолган сурхондарёлик йигитнинг жасади Қашқадарё вилоятининг Деҳқонобод туманидаги жарликдан топилгани топилгани ҳақида хабар берилган эди. Вилоят Фавқулодда вазиятлар бошқармаси ҳолат юзасидан қўшимча маълумот берди.
Унда айтилишича, унинг жасади топилган ҳудуд Деҳқонобод тумани эмас балки Қамаши туманининг Ўрмон хўжалигига қарашли ҳудуд эканлиги маълум бўлди.
Қашқадарё вилояти ИИБ матбуот хизмати келтирган маълумотга кўра, ҳолат юзасидан Қашқадарё вилояти ИИБ ЖҚБ, Қамаши тумани ИИБ, Деҳқонобод тумани ИИБ ходимлари, маҳаллий аҳоли, овчилар, ўрмон ишчилари, егирлар ҳамда вилоят ФВБ ходимларидан иборат қидирув гуруҳлари тузилиб, тоғли ҳудуддаги ғорлар ва сойликлар кўздан кечирилиб, яқин атрофда чорва молларини боқиб юрган чўпонлар билан тезкор-суриштирув ишлари олиб борилди.
Аниқланишича, 2 апрель куни Э.З. Жарқўрғон туманидан Ангор туманида яшовчи фуқаролар Ж.Б. ва Ж.К. билан бирга чорва молларини Сурхондарё вилояти Сариосиё туманининг Қашқадарё вилоятининг Яккабоғ туманига туташ тоғларига боқиш учун йўлга чиқиб кетиб, 2 май куни Қамаши тумани давлат ўрмон хўжалиги 13-квартал Қалоқ-Қўтон участкаси ҳудудида бедарак йўқолган.
Олиб борилган қидирув тадбирлари давомида 20 май куни Қамаши тумани давлат ўрмон хўжалигининг 13-кварталидаги Қалоқ-қўтон номли ер майдони ҳудудидаги тахминан 100-120 метр чуқурликдаги жарлик тубидан бедарак йўқолган фуқаро Э.З.ни жасади топилиб, олиб чиқилган.
Вилоят ФВБ тақдим этган дастлабки маълумотда йўқолган фуқаро тахминан 10 метр чуқурликдаги жарликдан топилгани қайд этилганди.
Айни пайтда ҳолат бўйича Қамаши тумани прокуратураси томонидан суриштирув ишлари олиб борилмоқда.
Аввалроқ Сирдарё вилоятида каналга чўкиб кетган 17 ёшли йигитнинг жасади қидирилаётгани, фарғоналик аёл икки нафар фарзанди билан Катта Фарғона каналига чўкиб кетгани, Навоийда олтинни ноқонуний ковлаб олишга уринган 5 кишини тупроқ босиб қолгани ҳақида хабар берилган.
Изоҳ (0)