Ўзбекистонда энг кўп улгуржи савдо амалга оширилган ҳудудлар маълум қилинди
Давлат статистика қўмитаси 2022 йил январь—апрель ойлари бўйича улгуржи савдо айланмасини эълон қилди.
Республика бўйича улгуржи савдо айланмаси 46,1 млрд сўм, яъни 2021 йилнинг январь—апрель ойларига нисбатан 19,7 фоизга ўсган.
Таркибий қисмлари 64,8 фоиз микрофирма ва кичик корхоналари ва 35,2 фоиз йирик корхоналар ҳиссасига тўғри келди.
Кичик бизнес субъектларининг улгуржи савдо айланмасидаги улуши 29,8 млрд сўмни ташкил қилган.
Бу эса 2021 йилнинг мос даврига нисбатан 12,8 фоизга ўсишни англатади.
Товар айланмасида энг юқори улуш Тошкент шаҳрида — 59,1 фоиз. Кейинги ўринларда Тошкент (7,4 фоиз) ва Фарғона (5,3 фоиз) вилоятларига тўғри келади.
Сўнгги йилларда улгуржи савдода давлат секторининг ўрни пасайиб бормоқда. Ушбу секторнинг жами улгуржи товар айланмасидаги улуши 0,1 фоизни ташкил қилди.
Нодавлат тасарруфга эга субъектлар томонидан улгуржи савдо айланмаси 46 млрд сўмни ва давлат тасарруфига эга корхоналар томонидан 28,7 млрд сўмни ташкил этди.
Ҳудудлар кесимида давлат мулкини ҳали ҳам Тошкент шаҳрида (0,10 фоиз), Навоий (0,17 фоиз) ва Андижон (0,04 фоиз) вилоятларида сақланиб қолинганлигини кўриш мумкин.
Бошқа барча ҳудудларда улгуржи савдо тўлиқ нодавлат мулкка тегишли.
