Фарғонада ўзбек ва беларус киноижодкорлари томонидан «Осиё арслони» фильмини суратга олиш ишлари бошланди. Бу ҳақда «Дарё» мухбири Азизбек Абдувалиев хабар бермоқда.
Ўзбекистон Кинематография агентлиги ва Беларусь Маданият вазирлиги буюртмаси асосида «Ўзбекфильм» ва «Беларусфильм» ҳамкорлигида олинаётган фильм Фарғона фарзанди, Совет Иттифоқи қаҳрамони Мамадали Топволдиев ҳақида ҳикоя қилади.
Беларусда уни «Казбек» деб аташган. Ушбу лойиҳани амалга ошириш бўйича келишувга 2021 йил кузида Минскда ўтказилган «Листопад» кинофестивалида эришилганди.
«Мамадали Топволдиев нафақат ўзбек, балки беларус халқининг ҳам қаҳрамони ҳисобланади. Ушбу фильм дўстлик, ҳаёт учун кураш, ўзгалар ҳаётини сақлаш ва фидойилик ҳақида», — дейди «Беларусфильм» бош директори Владимир Карачевский.
Ўзбек ва беларус кинематографи томонидан тенг улушларда молиялаштирилаётган фильмни «Мен террорчи эмасман» фильми режиссёри Муҳаммадали Искандаров бошчилигидаги ижодий гуруҳ тасвирга олмоқда. Бош ролни актёр Улуғбек Қодиров ижро этмоқда.
«Топволдиев образини гавдалантириш учун 25 килограммдан кўпроқ вазн ташлашимга тўғри келди. У киши ҳақида маълумотларни эшитганим сари бу инсонга нисбатан ҳайратим ва ҳурматим ошиб бормоқда. Бу фильм ҳақиқий тарихий асар бўлади», — дейди Улуғбек Қодиров.
Ўзбек ва белорус киноижодкорлари Фарғона вилоятининг Риштон туманида Мамадали Топволдиев мемориал музейини фойдаланишга топшириш тадбирида ҳам иштирок этди.
Музейда қаҳрамоннинг орден-медаллари, фахрий ёрлиқлар, рўзғор буюмлари, ёзишмалари, шахсий кийимлари, қуроллар, уруш ҳақидаги адабиётлар жамланган.
Изоҳ (0)