Намангандаги 43 та давлат ташкилотида ходимларни очиқ танлов йўли билан ишга қабул қилиш амалиёти йўлга қўйилди. Бу ҳақда журналист ва блогерлар учун ташкилланган матбуот анжуманида Давлат хизматини ривожлантириш агентлиги вилоят филиали раҳбарининг ўринбосари Иброҳим Ҳожиев маълум қилди, дея хабар беради «Дарё» мухбири Азизбек Абдувалиев.
Жорий йил 1 апрель ҳолатига вилоятдаги давлат ташкилотларида мавжуд 3131 та вакант штат бирлиги бўйича vacancy.argos.uz портали орқали танловлар эълон қилинган. Мазкур вакант лавозимлар учун 21 мингга яқин талабгорнинг ҳужжатлари келиб тушган. Улардан 7585 нафари тест, 5456 нафари суҳбат босқичига ўтказилиб, натижалари бўйича жами 2302 нафар талабгор танлов ғолиби деб топилган. 580 та вакант лавозим эгалари топилмай, қайта танловга қўйилган.
Иброҳим Ҳожиевга кўра, очиқ танлов йўли билан ишга қабул қилиш усули бошқарма бошлиқлари ва кадрлар бўйича мутасаддиларга ҳам маъқул келмоқда. Улар бу борадаги илтимос ёки босимлардан холи бўлаётганлари, қолаверса, шу туфайли тест ва суҳбат жараёнларидан ўтган малакали ходимларга эга бўлаётганларини билдирган.
«Биз очиқ танлов орқали ишга жойлашган собиқ номзодларимизнинг фаолиятини ҳам диққат билан кузатиб борамиз. Уларни лавозимидан бўшатиш масаласи ҳам мажбурий тарзда биз билан келишилади. Ҳозиргача 65 нафар ходим биз билан келишилган ҳолда лавозимидан озод этилди», — дейди Иброҳим Ҳожиев.
«Дарё» мухбирининг «ишдан бўшатишлар нима билан боғлиқ бўлиши мумкин?» деган саволига жавобан филиал мутасаддиси аксарият ҳолатларда бу ходимнинг таклиф этилган маошдан қониқмаганлиги ёки бошқа ишга ўтиши билан изоҳланишини билдирди.
«Базамизда 5 мингта тест саволи мавжуд. Улар билан бемалол танишиб, синовларга тайёргарлик кўрса бўлади. Фаолиятимиз давомида қайта-қайта тестларга кирган номзодларни ҳам кўрдик. Бу борада ҳеч қандай чеклов йўқ. Ягона чеклов — олий ўқув юртларига имтиҳонларда бўлгани каби тақиқланган усуллар ва ўзгалар ёрдамидан фойдаланмаслик. Тест жараёнлари тўлиқ камералар назорати остида, қолаверса, онлайн трансляция қилиб борилади. Баъзида тест ва суҳбат жараёнларидан ўтган номзодларни қайтариб юборган пайтларимиз бўлган. Чунки экспертларимиз томонидан ўтказилган якуний текширув давомида уларнинг тест пайти ноқонуний усуллардан фойдалангани ошкор бўлиб қолган», — дейди Иброҳим Ҳожиев.
Матбуот анжумани якунида журналист ва блогерлар Давлат хизматини ривожлантириш агентлиги Наманган вилоят филиалида тест ва суҳбатлар ўтказилиши жараёни билан бевосита танишиш имкониятига эга бўлди.
Изоҳ (0)