Тошкент вилояти Юқори Чирчиқда туманида кучли ёғингарчилик кузатилди, дея хабар бермоқда Фавқулодда вазиятлар вазирлиги.
Маълум қилинишича, 14 май куни соат 18:20 ларда Тошкент вилояти ҳудуди бўйлаб қисқа муддатда кучли ёмғир ёғиши натижасида вилоятнинг Юқори Чирчиқ тумани «Навбаҳор» МФЙ ҳудудидан оқиб ўтувчи Яйилмасой ўзанида ёмғир сувлари тошиши содир бўлган. Бунинг оқибатида Обод турмуш кўчасида жойлашган, тахминан, 25 та аҳоли хонадони, томорқа ер майдонларига сув кириши кузатилган.
Содир бўлган ҳодиса оқибатларини бартараф этиш ишларига вилоят Фавқулодда вазиятлар бошқармаси ҳамда унинг ҳудудий бўлими, Юқори Чирчиқ тумани Фавқулодда вазиятларда давлат тизимига кирувчи корхона ва ташкилотларнинг куч воситалари жалб этилиб, аҳоли хонадонларида сув тортиш ишлари олиб борилди. Ҳозирда тошқин сувлари талафотлари бартараф этилган.
Юзага келган ҳодиса оқибатида «Навбаҳор» маҳалласи Обод турмуш кўчаси ҳудудидаги пойдеворга эга бўлмаган хом ғиштдан қурилган хонадон биносига зарар етган.
Мазкур ҳолат оқибатида фуқароларнинг тан жароҳати олиши ва уй ҳайвонлари нобуд бўлиши тўғрисида маълумотлар келиб тушмаган.
Изоҳ (0)