Эпизодик роллари билан ҳам томошабинлар ёдида қолган россиялик актрисалар (фото)

Ҳатто 10 сониялик рол ҳам шундай ижро этилиши мумкинки, томошабин сизни бир умр эслаб қолади. Масалан, Леонид Гайдайнинг «Иван Васильевич касбини ўзгартиради» фильмидаги «Марфа Васильевна» ибораси билан таниш Нина Маслова ёки худди шу фильмдаги Якиннинг севгилиси «Гаграга кетяпман» жумласи билан эсда қолган Наталья Кустинская бунга ёрқин мисол бўлади.

Нина Маслова

Нина Масловани эпизодлар маликаси деб ҳам аташади. Актриса катта ролларни ижро этмаган, лекин кичик роллари билан ҳам томошабинлар ёдида қолган. Масалан, «Иван Васильевич ўз касбини ўзгартиради» фильмидаги шоҳнинг рафиқаси Марфа Васильевна роли уни ҳақиқий юлдузга айлантирди. Актриса иккинчи даражали роллари орқасидан ҳатто ўзига квартира ҳам сотиб олган.

Лариса Эремина

Марфа Васильевнанинг канизаклари орасида камсуқумгина ва қалин сочли яна бир эсда қоларли қиз бор эди. Уни актриса Лариса Эремина ижро этган. Актрисанинг истеъдоди ва жозибали кўриниши уни юлдузга айлантириши мумкин эди, лекин у карьерадан кўра турмуш қуришни афзал кўрди.

Бироқ у актрисалик фаолиятига якуний нуқта қўймади. Эремина Голливудга борди ва у ерда бир нечта фильм ва телекўрсатувларда, шу жумладан, машҳур «Марказий касалхонада» сериалида роль ўйнади. У, шунингдек, актёрлик маҳорати бўйича ҳам дарс беради.

Нина Гребешкова

Ўзининг ёрқин кўринишига қарамай, актриса Нина Гребешкова асосан эпизодик ролларга таклиф қилинган. Бунинг сабаби шундаки, режиссёр Леонид Гайдай унинг турмуш ўртоғи эди. Актриса эрига кундалик ҳаётдан чалғимасдан ижод қилиш имкониятини бериш учун асосий роллардан воз кечади.

Мисол учун, Гребешкова «Кавказ асираси» фильмининг суратга олиш майдончасига фақат ошқозон яраси билан оғриган эрига парҳез таом тайёрлаш учун боради. Шу сабабли ҳам актриса бошқа режиссёрнинг фильмини рад этганди. Дўстлари Гайдайни мазкур фильмда рафиқаси учун рол беришига кўндиришади, шу тариқа сценарийга Нина ажойиб тарзда ижро этган руҳий касаллар касалхонасидаги шифокор аёл роли киритилади.

Елена Сиплакова

Кўпчилик Елена Сиплаковани «Д’Артанян ва уч мушкетёр» фильмидаги маккор Миладнинг хизматкори қувноқ ва мафтункор Кети ролида эслайди. Актриса 1970—1980 йилларда фаол суратга тушди, у турли фильмларда 40 дан ортиқ ролларни ўйнади, шу жумладан, машҳур «Биз жаззданмиз» фильмида ҳам, лекин у деярли ҳеч қачон бош ролларни ижро этмаган.

Қиз «Афсунгарлар» фильмидаги Алёнушка роли учун кастингда иштирок этади. Фильм режиссёри Константин Бромбергнинг сўзларига кўра, «у мафтункор бўлса-да, унда маккоралик йўқ эди». Кейинчалик актриса экранлардан бирданига ғойиб бўлди: Африкага қилган саёҳатида Сиплакова безгакка чалинади, бу унинг соғлиғи ва ташқи кўринишига жиддий таъсир қилади. Аммо бу муаммолар Елена Сиплакованинг кинодаги карьерасига чек қўйишига имкон бермади — у режиссёр сифатида ишлай бошлади.

Наталья Кустинская

1960 йилларда Франциянинг Candide журнали Наталья Кустинскаяни дунёдаги энг чиройли актрисалар ўнлигига киритади. У кўплаб фильмларда бош ролларни ўйнаган, лекин актрисанинг энг эсда қоларли иши «Иван Васильевич касбини ўзгартиради» комедияси бўлиб, у режиссёр Якиннинг севгилиси ва бош қаҳрамон Зиночканинг рақиби ролини ўйнаган.

Наталья Трубникова

Наталья Трубникова ўз фаолиятини балерина сифатида бошлаган ва айнан рақс тушиш қобилияти унга «31 июнь» фильмда роль ўйнашига ёрдам берган. Мазкур фильмда у ўзининг ягона асосий ролини ўйнади, у малика Мелисента қиёфасида пайдо бўлди. Шундан сўнг Наталья, ўзининг сўзларига кўра, «киносинов актрисаси»га айланди: режиссёрлар ҳеч бири уни ролга маъқулламади.

Бир неча йил ўтгач, Трубникова ва ниҳоят ролларга таклиф қилинди, лекин у асосан эпизодик қаҳрамонларни, масалан, «Қор маликаси сири» фильмида сарой хоними каби ролларни ижро этди.

Наталья Вавилова

«Москва кўз ёшларга ишонмайди» фильми экранларга чиққандан сўнг, Наталья ҳақиқий юлдуз бўлиб уйғонди, гарчи унинг роли иккинчи даражали бўлса ҳам — у бош қаҳрамоннинг қизини ўйнади. Ёш актрисанинг карьераси бирданига юқорига кўтарилди, аммо «Николай Подвоиский» тарихий фильмининг суратга олиш жараёнида у отдан йиқилиб, жароҳат олди.

Режиссёр Вавилова тузалиб кетгунча кутолмасди, унинг ролига бошқа актрисани тасдиқлади. Қиз бундан қаттиқ хафа бўлди — тез орада оилавий ҳаётига эътибор бериб, кинодаги карьерасини якунлади.