Rossiya urushi tomonidan vayron qilingan infratuzilmani qayta tiklash uchun Ukrainaga 500 dan 600 milliard yevrogacha kerak bo‘ladi. Bu haqda Yevropa komissiyasi vitse-prezidenti Valdis Dombrovskis ma’lum qildi, deb yozadi Politico.

Foto: Reuters

Marokashda nutq so‘zlayotib, Dombrovskis qayta tiklash “xalqaro hamjamiyatning muvofiqlikda harakat qilishini talab etishi va Yevropa ittifoqi tomonidan bu muvofiqlashtirishni amalga oshirishga tayyorligi”ni ma’lum qildi.

Shuningdek, u Yevroittifoq rekonstruksiya uchun zarur bo‘lgan ushbu ehtiyojlarni qo‘llab-quvvatlashini aytdi.

Dombrovskis qayd etishicha, shu oy sal keyinroq “infratuzilmani qayta tiklash bo‘yicha ushbu ko‘makni Yevroittifoqqa qo‘shilish uchun nomzod mamlakat sifatida Ukrainaga zarur bo‘ladigan tuzilmaviy islohotlar bilan bog‘lovchi” taklif paydo bo‘ladi.

Yevroittifoq Ukraina uchun birdamlik trast fondini yaratish ustida ishlamoqda. Bu Yevroittifoqning rasmiy vakili rekonstruksiya ko‘lamini baholashi bilan bog‘liq birinchi holatdir. Ammo ushbu raqam urush davom etavergani sari o‘zgarishi mumkin.

Yevroittifoq rasmiy shaxslari Bryusselni Ukrainaning Yevroittifoqqa qo‘shilishi bo‘yicha sa’y-harakatlar doirasida jangovar harakatlar tugaganidan keyin Ukrainaga yordam ko‘rsatishda yetakchi rolini o‘ziga olishga chaqirmoqda.

Ushbu sa’y-harakatlarni qanday moliyalashtirish bo‘yicha turli g‘oyalar bor, ular orasida Rossiyaning muzlatib qo‘yilgan aktivlarini musodara qilish, Rossiyani tinch yo‘l bilan tartibga solish doirasida to‘lashga majburlash yoki xalqaro donorlardan pul yo‘naltirish usullari bor.