АҚШда COVID-19 пандемияси оқибатидаги ўлимлар сони 1 миллионтадан ошаётган бир пайтда мамлакат фуқароларининг ўлимга бўлган муносабати ўзгармоқда, деб хабар беради Reuters.
Жасад куйдириш (кремация) кўпаймоқда, азадорлар эса ўз яқинларининг хокини тақинчоқ ва бошқа безаклар учун бриллиант кўринишидаги ёдгорликка айлантирмоқда.
Бу соҳада етакчилик қилаётган иккита компания бўлиб, булар Иллинойсда жойлашган LifeGem (у кулни бриллиантга айлантириш жараёнини биринчи бўлиб бошлаб берган) ҳамда Техаснинг Eterneva (у эса бозорда етакчи ҳисобланади) компанияларидир.
«Биз анъаналар ўзгараётганини, кўплаб истеъмолчилар анъанавий дафн қилишдан воз кечаётганини кўра бошлагандик. Кейин эса пандемия бу жараённи жуда тезлаштириб юборди, чунки бу энди шунчаки вариант эмасди», — деди Eterneva асосчиси ва бош директори Адел Арчер.
Ҳақиқатан ҳам, Шимолий Америка Кремация ассоциацияси (SАNА) маълумотларига кўра, 2016 йилдаёқ жасадни куйдириш дафн қилишдан ошиб кетган. Пандемия даврида АҚШда жасадларнинг тахминан 55 фоизи куйдирилган.
LifeGem компанияси мурда куйдирилганидан кейин қолган кулни олмосга айлантириш учун илк патентни қўлга киритган, бу жараённи у 20 йил аввал илк бор синаб кўрган.
Жараённинг ўзи Ер юзасидан катта чуқурликдаги юқори ҳароратларни ҳосил қилишга асосланади.
LifeGem’да кул зарраларни майдалайдиган ускунага жойлаштирилади. «Майдалаш жараёнини тугатганимиздан кейин, биз углеродни элакдан ўтказиб оламиз деса ҳам бўлади, сўнг у юқори босимли ячейкага солинади», — деди LifeGem вице-президенти Дин Ван ден Бисен.
У ердан олинган зарралар бир неча ҳафта давомида «қотиш» жараёнини бошдан ўтказади, кейин эса якуний олмос ясаш машинасига ўрнатилади.
Бундай муҳитда олмос ишлаб чиқариш учун тоза углерод ажратиб олиш мумкин. Якуний натижа эса «ҳақиқий бриллиантлар»дан иборат бўлади.
Бутун жараён ўз нархига эга, у 3000 доллардан бошланади.
Арчер изоҳлашича, бундай ёдгорлик азадор кишига қайғуни енгиб ўтиш учун таянч бўлиши, ҳаётига мазмун бериши мумкин.
Изоҳ (0)