Ўзбекистонда илк бор аллергик сезувчанлик паспорти топширилди

12 май куни Бутунжаҳон астма ва аллергияга қарши курашиш куни доирасида Халқаро «Астма ва аллергия-2022» конференцияси бўлиб ўтди.

Мазкур тадбирда илк бор 5 нафар даволанувчи бемор болаларга аллергик сезувчанлик паспорти топширилди.

Тадбир Инно технопаркида ўтказилди. Бутунжаҳон астма ва аллергияга қарши курашиш куни доирасида бўлиб ўтган халқаро семинар мавзуси «Астма ва аллергия-2022. Ташхислаш ва даволашнинг инновацион усуллари» деб номланди.

Семинар беш йўналишда ташкил этилди:

• 1-йўналиш — Аллерген гул чанги қопқонлари ва унинг мониторинги
• 2-йўналиш — Аллергологияда шошилинч ҳолатлар. Шошилинч ҳолатда бронхиал астма хуружида бемор ва шифокорнинг хатти-ҳаракатлари.  
• 3-йўналиш — Аллергиянинг молекуляр диагностикаси.
• 4-йўналиш — Тери синамалари. Прик-тестлар.
• 5-йўналиш — Амалий дерматология.

Шунингдек, мавзуга доир расмлар, ижодий ишлар ва фотосуратлар кўргазмаси ҳамда онлайн болалар расм танлови ҳам ташкил этилди. Семинар сўнгида иштирокчиларга сертификат топширилди.

Тадбирнинг энг муҳим воқеаларидан бири эса илк бора 5 нафар даволанувчи беморларга аллергик сезувчанлик паспорти топширилиши бўлди.