O‘zbekistonda ilk bor allergik sezuvchanlik pasporti topshirildi

12-may kuni Butunjahon astma va allergiyaga qarshi kurashish kuni doirasida Xalqaro “Astma va allergiya-2022” konferensiyasi bo‘lib o‘tdi.

Mazkur tadbirda ilk bor 5 nafar davolanuvchi bemor bolalarga allergik sezuvchanlik pasporti topshirildi.

Tadbir Inno texnoparkida o‘tkazildi. Butunjahon astma va allergiyaga qarshi kurashish kuni doirasida bo‘lib o‘tgan xalqaro seminar mavzusi “Astma va allergiya-2022. Tashxislash va davolashning innovatsion usullari” deb nomlandi.

Seminar besh yo‘nalishda tashkil etildi:

• 1-yo‘nalish — Allergen gul changi qopqonlari va uning monitoringi
• 2-yo‘nalish — Allergologiyada shoshilinch holatlar. Shoshilinch holatda bronxial astma xurujida bemor va shifokorning xatti-harakatlari.  
• 3-yo‘nalish — Allergiyaning molekulyar diagnostikasi.
• 4-yo‘nalish — Teri sinamalari. Prik-testlar.
• 5-yo‘nalish — Amaliy dermatologiya.

Shuningdek, mavzuga doir rasmlar, ijodiy ishlar va fotosuratlar ko‘rgazmasi hamda onlayn bolalar rasm tanlovi ham tashkil etildi. Seminar so‘ngida ishtirokchilarga sertifikat topshirildi.

Tadbirning eng muhim voqealaridan biri esa ilk bora 5 nafar davolanuvchi bemorlarga allergik sezuvchanlik pasporti topshirilishi bo‘ldi.