Ўзбекистон бўйича жами 108 та маданий мерос объектида 146 та ноқонуний қурилма қурилгани аниқланди

Прокуратура идоралари томонидан маданий мероснинг кўчмас мулк объектларида ноқонуний қурилмаларни бартараф этиш бўйича ўтказган назорат тадбирларида республика бўйича жами 108 та маданий мерос объектида 146 та ноқонуний қурилма қурилгани аниқланди. Бу ҳақда Бош прокуратура матбуот хизмати хабар берди.

Таъкидланишича, ушбу тадбирлар натижаси бўйича маданий мерос объектлари ҳудудида қурилган 7 та ноқонуний қурилмалар, жумладан, Сурхондарёда «Зартепа» (I-V асрлар), «Карвонтушди» (I-VI), «Исмоилтепа» (I-VIII) ва «Мангузартепа» (I-IV), Қашқадарёда «Тўрткўлтепа» (I-VI) археология объекти, Хоразмда «Қибла тозабоғ» (XIX) архитектура ёдгорлиги ҳудудидаги ноқонуний қурилмалар буздирилди.

Шунингдек, 71 та объектда қурилган 76 та ноқонуний қурилмани буздириш юзасидан мутасадди идоралар томонидан ёзма кўрсатмалар берилиши таъминланган, 44 та маданий мерос объектидаги 63 та ноқонуний қурилмаларни буздириш юзасидан судларга даъво аризалари киритилган. Масалан, Термиз туманида жойлашган «Мангузартепа» археология ёдгорлиги (I-IV аср) устига уяли алоқа оператори томонидан ноқонуний ўрнатилган антенна қурилмаларини буздириш бўйича судга даъво аризаси киритилди;

Бундан ташқари, ноқонуний қурилма қурган 26 нафар шахс маъмурий жавобгарликка тортилган.

Аввалроқ Бухорода қўйхонага айлангани рад этилган «Чор минор» мадрасаси чорбоғида тандирдан ҳам фойдаланиб келингани маълум бўлгани, Қорақалпоғистонда мақбара ҳудудида қабр учун ерлар сотилаётгани, Самарқандда «снос»га тушган ҳудуддан топилган Қуръон оятлари туширилган қадимий қабртошлар қайси асрга ва кимга тегишли экани аниқлангани тўғрисида хабар берилганди.