Оила ва хотин-қизлар давлат қўмитаси «Маҳаллаларда хотин-қизларнинг бандлигини таъминлаш ва саломатлигини мустаҳкамлаш марказлари фаолиятини ташкил этиш тўғрисида»ги Вазирлар Маҳкамаси қарори лойиҳасини муҳокамага қўйди.
Қарор лойиҳасига кўра, 2022 йил 1 июндан бошлаб маҳаллаларда маҳалла фуқаролар йиғини ҳузурида юридик шахс мақомига эга бўлмаган қуйидаги вазифаларни амалга оширишни назарда тутувчи хотин-қизларнинг бандлигини таъминлаш ва саломатлигини мустаҳкамлаш марказлари ташкил этилади:
- ишсиз, айниқса, қишлоқ жойларда бола тарбияси билан уйда ўтириб қолган эҳтиёжманд аёлларни, шунингдек, «темир дафтар», «аёллар дафтари» ва «ёшлар дафтари»га киритилган хотин-қизларни бандлигини таъминлаш мақсадида маҳаллаларда тикувчилик, қандолатчилик, пазандачилик каби йўналишларда ишлаб чиқариш ва хизмат кўрсатиш фаолиятини йўлга қўйиш;
- хотин-қизларнинг бандлигини таъминлаш билан бир қаторда маҳаллаларни географик жойлашуви, аҳоли сони ва ижтимоий-иқтисодий ривожлантириш бўйича ўсиш нуқталарини инобатга олган ҳолда тегишли касбларга ва тадбиркорлик кўникмаларига ўргатишни ташкил этиб, уларнинг келгусида ўзлаштирган касблари бўйича тадбиркорлик фаолиятини бошлашига ва уни ривожлантиришга кўмаклашиш;
- хотин-қизлар тадбиркорлигини ривожлантириш, бандлигини таъминлаш, касб-ҳунар эгаллашлари учун яратилаётган кенг имкониятлар ва имтиёзлар ҳақида уларни кенг хабардор қилиш мақсадида зарур маълумот ва тавсияларни бериб бориш;
- хотин-қизларнинг саломатлигини мустаҳкамлаш мақсадида фитнес, шейпинг каби соғломлаштиришга мўлжалланган хизмат кўрсатиш фаолиятини эҳтиёжманд хотин-қизлар учун бепул йўлга қўйиш;
- соғлом турмуш тарзини тарғиб қилиш, хотин-қизларнинг тиббий маданиятини ривожлантириш, жисмоний тарбия-соғломлаштириш ва оммавий спорт ҳаракатларини тиббиёт профилактикаси билан биргаликда йўлга қўйиш.
Белгиланишича:
- Марказларга «Маҳаллаларда хотин-қизларнинг бандлигини таъминлаш ва саломатлигини мустаҳкамлаш марказларини барпо этиш, марказларга давлат гранти ажратиш ва ундан фойдаланиш тартиби тўғрисидаги низом» асосида давлат гранти ажратилади;
- марказлар туман (шаҳар) ҳокимликлари томонидан маҳаллий бюджетларнинг қўшимча манбалари ва қонунчилик ҳужжатларида тақиқланмаган бошқа маблағлар ҳисобидан барпо этилади;
- марказлар маҳаллалар томонидан тикувчилик, қандолатчилик, фитнес, шейпинг, хотин-қизларни касбга ўқитиш фаолиятини ташкил этиш учун тадбиркорлик субъектларига узоқ муддатли ижарага берилади.
Аввалроқ Ўзбекистонда гендер тенглик масалалари бўйича янги тузилма, «Аёллар дафтари»га киритилган хотин-қизларни қўллаб-қувватлаш жамғармаси ташкил этилгани тўғрисида хабар берилганди.
Изоҳ (0)