Ўзбекистонда 4 ойда йўл қурилиши соҳасида 3 мингдан ортиқ қонунбузарлик ҳолати аниқланди

АОКАда ўтказилган брифингда «Ўзйўлинспекция» ахборот хизмати раҳбари Комилжон Шамсиддинов инспекция томонидан 2022 йилнинг январь—апрель ойлари давомида амалга оширилган ишлар тўғрисида маълумот берди.

Қайд этилишича, январь—апрель ойларида йўл қурилиши объектлари ҳамда йўл-қурилиш материаллари, буюмлари ва конструкцияларини ишлаб чиқаришда техник жиҳатдан тартибга солишга оид норматив ҳужжатлар талабларига риоя этилишини назорат қилиш йўналишида 1878 та объектда назорат ишлари ўтказилган. Натижада 3143 та қоида бузилиш ҳолати аниқланиб, уларни бартараф этиш бўйича буюртмачи, пудратчи, лойиҳачи ва йўлларни сақловчи ташкилотларнинг масъул ходимларига 1941 та бажарилиши мажбурий бўлган кўрсатмалар берилган.

Бугунги кунда ижро муддати келган 1255 та кўрсатмадаги 2013 та қоида бузилишлар бартараф этилган. Бажариш муддати келмаган 686 та кўрсатмадаги 1130 та қоида бузилишларнинг ижроси ҳудудий давлат инспекторларининг қатъий назорати остига олинган.

Назорат қилиш ишлари натижасида 61 та ҳолат бўйича умумий суммаси қарийб 1 миллиард 339 миллион сўмлик сифатсиз бажарилган қурилиш-монтаж ишлар ҳажмини тўловдан чиқариш бўйича буюртмачиларга талабномалар киритилган. Масалан, Сирдарё вилояти Сардоба тумани ҳудудидан ўтувчи 4Р199 автомобиль йўлининг 0—37-километрлари оралиғида ўтказилган жорий таъмирлаш натижасида 129,3 миллион сўмлик, Самарқанд вилояти Нуробод тумани Сепки қишлоғидаги 53-мактабга олиб борувчи ички йўлни таъмирлашда 112,9 миллион сўмлик, Бухоро вилоятидаги Вобкент ва Ромитан туманлари ҳудудидан ўтган 4Н155 автомобиль йўлининг 8,5—11 километрлари оралиғидаги жорий таъмирлаш натижасида 47,2 миллион сўмлик ишлар сифатсиз бажарилгани, талабга мутлақо жавоб бермагани учун ҳисобдан чиқарилган, яъни пули тўлаб берилмайди.

35 та ҳолатдаги 406,33 миллион сўм миқдорида бўлган сифатсиз бажарилган ишлар бартараф этилишига эришилган. Қолган 26 та ҳолатдаги 932,48 миллион сўмлик сифатсиз ишлар масаласи ҳудудий давлат инспекторларининг назорати остига олинган.

Бундан ташқари, қўпол равишдаги қоида бузилишларга йўл қўйилган 72 та ҳолат бўйича пудратчи ташкилотларнинг мансабдор шахсларига нисбатан тегишли чоралар қўллаш бўйича Маъмурий жавобгарлик тўғрисидаги кодекснинг 99 (шаҳарсозлик тўғрисидаги қонунчиликни бузиш) ва 147-моддалари (йўлларга, йўл иншоотларига, йўл ҳаракатини тартибга солиб турувчи техник воситаларга шикаст етказиш, уларни сақлаш қоидаларини бузиш) асосида маъмурий баённома расмийлаштирилган.

Шаҳарсозлик соҳасидаги қонун ҳужжатлари талабларини қўпол равишда бузаётган мансабдор шахсларни жавобгарликка тортиш тўғрисида 10 та ҳолат бўйича юқори турувчи органларига тақдимнома киритилган.