Тошкентда меҳрибонлик уйлари битирувчиларига кўп қаватли уй ертўласидан хонадон ажратилаётгани тўғрисида хабарлар тарқалди

Ижтимоий тармоқларда Тошкент шаҳри Миробод тумани, Абдурауф Фитрат кўчасида жойлашган 4 қаватли 33/2 уйининг ертўласида меҳрибонлик уйлари битирувчилари учун уй-жойлар ажратилаётгани айтилган хабарлар тарқалди. Миллий гвардия ахборот хизматига кўра, туман ҳокимининг ўринбосари ушбу хонадонлар меҳрибонлик уйлари тарбияланувчилари учун мўлжалланмаганини маълум қилган.

Ўзбекистон президентининг 2021 йил 9 августдаги «Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида» ги фармонига мувофиқ уй-жой билан таъминланмаган ўқув-тарбия муассасалари ўқувчиларига, етим болалар ва ота-она қарамоғидан маҳрум бўлган болалар учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари шаҳар ва туманларда қурилган кўп қаватли турар жой биноларида бирламчи кўчмас мулк бозорида хонадонлар сотиб олинади.

Миробод тумани ҳокимининг архитектура, капитал қурилиш ва коммуникацияларни ривожлантириш бўйича ўринбосари Фарҳод Нажмиддинов ижтимоий тармоқларда тарқалган хабарларга муносабат билдириб, ушбу хонадонлар меҳрибонлик уйлари тарбияланувчилари учун эмаслигини билдирган.

«Биринчидан, бу ертўла эмас, балки деразалари деярли 2х2 метргача бўлган қуйи қават. Иккинчидан, мазкур манзилдаги уйлар ҳақиқатан ҳам турар жой биноларига айлантирилмоқда. Аммо ушбу хонадонлар меҳрибонлик уйлари битирувчилари учун мўлжалланмаган, чунки янги турар жой биноларидан меҳрибонлик уйлари болалари учун хонадонлар ажратилиши юзасидан президент фармони мавжуд. Комиссия қарорига асосан 33/2 кўп қаватли уйнинг янгиланган қуйи қаватидан кимга хонадон ажратилиши аниқланади. Лекин яна такрор айтаман, бу хонадонлар меҳрибонлик уйларининг битирувчилари учун эмас», — деган Нажмиддинов.

Эслатиб ўтамиз, президент 9 августдаги қарори билан меҳрибонлик уйлари (16 та, 1 541 нафар бола), болалар шаҳарчалари (4 та, 236 нафар бола), оилавий болалар уйлари (5 та, 46 нафар бола) ва Соғлиқни сақлаш вазирлиги тизимининг болалар уйлари (13 та, 506 нафар бола) Миллий гвардияга бириктирилган эди.