Тошкентда қалбаки долларни банкомат орқали сўмга айирбошлаган шахслар аниқланди

Тошкент шаҳрининг Яшнобод туманида қалбаки 2 минг долларни банкомат орқали сўмга айирбошлаган шахслар аниқланди, деб хабар беради Бош прокуратура ҳузуридаги департамент.

Маълум қилинишича, департаментнинг Яшнобод туман бўлими томонидан АИТБ «Ипак йўли банк» Амалиёт бошқармасининг мурожаатига асосан терговга қадар текширув ўтказилган. Текширув давомида С.Ф. исмли шахс ва бошқалар ушбу банк филиалига тегишли Паркент кўчасида жойлашган банкомат орқали қалбаки 2 минг долларни сўмга айирбошлаб олгани аниқланган.

Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари ўтказилмоқда.

Бундан олдин Тошкентда 27 ёшли шахс тўлов инфокиоскини Nexia’сига ортиб, ўғирлаб кетгани, Фарғонада 18 ёшли йигит банкоматни бузаётганида қўлга тушгани, Андижонда банкоматни бузиб, ундаги пулларни ўғирлашга уринган шахс қўлга олингани тўғрисида хабар берилганди.