Эндиликда Ўзбекистонда тўлов ташкилоти, тижорат банкларининг электрон тўлов хизматлари (шу жумладан, мобил иловалар орқали), электрон тижорат платформалари – маркетплейсларнинг ахборот тизимлари ёрдамида масофадан туриб амалга оширилган харидлар учун ҳам кэшбэк тўланади. Бу ҳақда Давлат солиқ қўмитаси хабар берди.
Солиқ органлари ахборот тизимлари билан электрон тўловлар (Paynet, Oson, Payme, Click, Apelsin ва бошқалар) интеграциясининг ижобий натижаларига кўра харидлар электрон тўлов тизимлари орқали амалга оширилганда QR-кодли чек шаклланмоқда.
Агар истеъмолчи кэшбэк тизимида рўйхатдан ўтган бўлса, у ҳолда маркетплейслар орқали амалга оширилган харид суммасининг 1 фоизи «Солиқ» мобил иловасида автоматик тарзда акс этади.
Шунингдек, кэшбэк олиш учун электрон чекдаги QR-кодни сканерлаш имкони ҳам мавжуд.
Эслатиб ўтамиз, автомобиль, авиа ва темир йўл чипталари харид қилинганда, коммунал ва алоқа хизматлари учун тўлов қилинганда кэшбэк тўланмайди.
Маълумот учун, Ўзбекистонда 2022 йил 1 январдан харид чекларини «Солиқ» мобил дастури орқали рўйхатдан ўтказган жисмоний шахслар харид суммасидан 1 фоизига кэшбэкка эга бўлмоқда. 2021 йилнинг октябрь ойида президентнинг назорат-касса техникасидан фойдаланишни такомиллаштиришга доир қарори қабул қилинганди. Ҳужжат билан 2022 йил 1 январдан бошлаб чакана савдо, умумий овқатланиш ва аҳолига маиший хизмат кўрсатиш объектларида харидни амалга оширган ҳамда ушбу харидни солиқ органларининг махсус мобил иловасида харид чекининг QR-код ёрдамида сканерлаш орқали рўйхатдан ўтказган жисмоний шахсларга уларнинг банк карталарига ой якуни билан харид суммасининг 1 фоизи республика бюджетидан қайтарилади.
Изоҳ (0)